នាយករដ្ឋមន្រ្តីហុងគ្រី លោក Viktor Orban មានការការព្រួយបារម្ភចំពោះវត្តមានរបស់ទាហានលោកខាងលិច នៅក្នុងប្រទេសអ៊ុយក្រែន ដោយបានពណ៌នាថា វាជាសញ្ញាមួយផ្សេងទៀតនៃការកើនឡើងនៃជម្លោះយោធា ដែលអាចនាំឲ្យមានសង្គ្រាមពិភពលោកមួយទៀត។

នៅក្នុងកម្មវិធីពេលព្រឹកមួយ នៅលើវិទ្យុ Kossuth លោកបានលើកឡើងនូវ «ព័ត៌មានគួរឱ្យភ្ញាក់ផ្អើល» ថ្មីៗចំនួនពីរអំពីអរិភាព នៅក្នុងប្រទេសអ៊ុយក្រែន។ លោក Orban បាននិយាយថា៖«យោងតាមរបាយការណ៍របស់រុស្ស៊ី ទាហានអាមេរិក និងបារាំង ត្រូវបានសម្លាប់ នៅក្នុងការវាយប្រហារតាមអាកាស ដែលធ្វើឡើងដោយជនជាតិរុស្ស៊ី នៅលើទឹកដីអ៊ុយក្រែន ដែលបង្ហាញថា ទាហានទាំងនេះ មានវត្តមាននៅទីនោះ។

លោកនាយករដ្ឋមន្ត្រី បានកត់សម្គាល់ឃើញថា៖«ដំបូងឡើយ អ្នកគ្រាន់តែនិយាយថា អ្នកគាំទ្រសង្រ្គាម បន្ទាប់មកអ្នកបញ្ជូនអាវុធទៅទីនោះ ហើយមិនយូរមិនឆាប់ ទាហានអាចត្រូវបានគេសម្លាប់។ នេះជាអ្វីដែលបានកើតឡើង នៅក្នុងប្រទេសអ៊ុយក្រែនចំពោះអ្នកដែលមានឋានៈជាយោធាមកពីអឺរ៉ុបខាងលិច និងអាមេរិក»។ លោកបានណែនាំមេដឹកនាំអឺរ៉ុប ឲ្យយកចិត្តទុកដាក់លើរបាយការណ៍ទាំងនេះ បើទោះជាលោកបានបន្ថែមថា ព័ត៌មាននេះទាមទារការវិភាគបន្ថែមទៀតក៏ដោយ។