អនុរដ្ឋមន្ត្រីការបរទេសរុស្ស៊ីលោក Sergey Ryabkov បាននិយាយនៅក្នុងបទសម្ភាសន៍ជាមួយសារព័ត៌មាន TASS ថា ប្រទេសរុស្ស៊ី កំពុងពិចារណាការបន្តការសាកល្បងនុយក្លេអ៊ែរ នៅពេលដែលសហរដ្ឋអាមេរិក បន្តគោលនយោបាយបង្កើនភាពតានតឹងកាន់តែខ្លាំងឡើង។

នៅពេលសួរថាតើទីក្រុងមូស្គូអាចបន្តការសាកល្បងនុយក្លេអ៊ែរតទៅទៀត ដើម្បីឆ្លើយតបទៅនឹងគោលនយោបាយបង្កើនភាពតានតឹងកាន់តែខ្លាំងឡើងរបស់សហរដ្ឋអាមេរិកឬយ៉ាងណានោះ លោកបាននិយាយថា៖«ពិតជាមានបញ្ហានេះ។ ខ្ញុំមិនចង់បង្ហាញអ្វីទេ ប៉ុន្តែគ្រាន់តែនិយាយដោយសាមញ្ញថា ស្ថានភាពគឺស្មុកស្មាញណាស់។ បញ្ហានេះ គឺស្ថិតក្រោមការត្រួតពិនិត្យជាប្រចាំទាំងស្រុងនៃធាតុផ្សំទាំងអស់របស់វា និងគ្រប់ទិដ្ឋភាពទាំងអស់របស់វា»។

លោក Vladimir Yermakov ប្រធាននាយកដ្ឋានមិនរីកសាយភាយ និងការគ្រប់គ្រងអាវុធរបស់ក្រសួងការបរទេសរុស្ស៊ី បានប្រាប់សារព័ត៌មាន TASS កាលពីខែកុម្ភៈថា សញ្ញាប្រយោលមួយចំនួនបង្ហាញថាមានឱកាសដែលទីក្រុងវ៉ាស៊ីនតោន អាចបន្តការសាកល្បងនុយក្លេអ៊ែរពេញលេញឡើងវិញ។ មេដឹកនាំ  រុស្ស៊ី បានព្រមាននៅពេលនោះថា ប្រសិនបើអាមេរិកដើរលើផ្លូវនោះ ទីក្រុងមូស្គូ នឹងត្រូវបង្ខំចិត្តឆ្លើយតបបែបនោះដែរ។