ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump កាលពីថ្ងៃសៅរ៍ (៣០ វិច្ឆិកា) បានទាមទារឱ្យបណ្ដាប្រទេសសមាជិក BRICS ប្តេជ្ញាថានឹងមិនបង្កើតរូបិយប័ណ្ណថ្មី ឬគាំទ្ររូបិយប័ណ្ណផ្សេងទៀតដែលនឹងជំនួសប្រាក់ដុល្លាររបស់សហរដ្ឋអាមេរិកនោះទេ បើមិនដូចច្នេះនឹងត្រូវប្រឈមពន្ធ ១០០% ពីទីក្រុងវ៉ាស៊ីនតោន។

លោក Trump បានសរសេរបង្ហោះនៅលើវេទិកាប្រព័ន្ធផ្សព្វផ្សាយសង្គម Truth Social របស់ខ្លួនថា "យើងទាមទារឱ្យមានការប្តេជ្ញាចិត្តពីប្រទេសទាំងនេះថាពួកគេនឹងមិនបង្កើតរូបិយប័ណ្ណ BRICS ថ្មី ឬគាំទ្ររូបិយប័ណ្ណផ្សេងទៀតដើម្បីជំនួសប្រាក់ដុល្លារអាមេរិកដ៏ខ្លាំងក្លានេះទេ បើមិនដូចច្នេះពួកគេនឹងប្រឈមពន្ធ ១០០% ហើយអាចត្រូវបញ្ឈប់ការលក់ទៅកាន់សេដ្ឋកិច្ចសហរដ្ឋអាមេរិក"។

លោក Trump បន្តថា "វាគ្មានឱកាសទេដែល BRICS នឹងជំនួសប្រាក់ដុល្លារអាមេរិកក្នុងពាណិជ្ជកម្មអន្តរជាតិបាន ហើយប្រទេសណាដែលព្យាយាមធ្វើបែបនេះ គួរតែត្រៀមខ្លួនចាកចេញពីសេដ្ឋកិច្ចដ៏ធំរបស់សហរដ្ឋអាមេរិកឱ្យហើយទៅ”។

គួររម្លឹកថា បន្ទាប់ពីទីក្រុងវ៉ាស៊ីនតោន បានដាក់ទណ្ឌកម្មកាន់តែខ្លាំងលើរុស្ស៊ី ជុំវិញសង្រ្គាមអ៊ុយក្រែនឆ្នាំ២០២២ ក្រុមប្រទេសដែលគេស្គាល់ថា BRICS - ប្រេស៊ីល រុស្ស៊ី ឥណ្ឌា ចិន អាហ្រ្វិកខាងត្បូង អេហ្ស៊ីប អេត្យូពី អ៊ីរ៉ង់ និងអារ៉ាប់រួម - បានចាប់ផ្តើមការពិភាក្សាកាន់តែខ្លាំងឡើងជុំវិញការពឹងផ្អែកតិចជាងមុនលើប្រាក់ដុល្លារ នេះបើតាមរបាយការណ៍ពីសារព័ត៌មាន Politico។ 

ការជំនួសប្រាក់ដុល្លារគឺជាគោលដៅរបស់ក្រុម BRICS អស់រយៈពេលជាច្រើនឆ្នាំ ប៉ុន្តែបំណងនេះត្រូវបានរារាំងដោយការមិនចុះសម្រុងគ្នាក្នុងចំណោមប្រទេសសមាជិកផ្សេងៗ៕