នៅពេលដែលកិច្ចព្រមព្រៀងបទឈប់បាញ់រវាងលីបង់ និងអ៊ីស្រាអែល កំពុងតែបន្តក្រោយបានចូលជាធរមានកាលពីព្រឹកថ្ងៃពុធ ជនភៀសខ្លួនលីបង់រាប់ពាន់នាក់ ដែលពោរពេញដោយភាពរីករាយ និងភាពមិនច្បាស់លាស់ ឥឡូវនេះបន្តសម្រុកត្រឡប់ទៅផ្ទះសម្បែងវិញនៅថ្ងៃអាទិត្យ (០១ ធ្នូ) ពីរដ្ឋធានីបេរូត និងកន្លែងផ្សេងទៀត ដើម្បីចាប់ផ្តើមដំណើរដ៏វែងឆ្ងាយនៃការកសាងជីវិតរបស់ពួកគេឡើងវិញ បន្ទាប់ពីជម្លោះដ៏បំផ្លិចបំផ្លាញជាច្រើនខែ។

អស់រយៈពេលជាងពីរខែមកហើយ ផ្លូវនានាក្នុងទីក្រុងបេរូត តែងតែពោរពេញដោយសំឡេងគ្រហឹមនៃយន្តហោះចម្បាំង និងការបំផ្ទុះគ្រាប់បែក។ ជើងហោះហើរជាច្រើនដែលបានផ្អាកចាប់តាំងពីខែកញ្ញាមក បានបើកដំណើរការឡើងវិញនៅថ្ងៃសៅរ៍ (៣០ វិច្ឆិកា) ដោយអាកាសយានដ្ឋានបេរូត រំពឹងថានឹងស្ដារឡើងវិញ ៩០% នៃប្រតិបត្តិការហោះហើររបស់ខ្លួននៅដើមខែធ្នូនេះ។

ចាប់ពីពេលដែលកិច្ចព្រមព្រៀងបទឈប់បាញ់ចូលជាធរមាន ជនជាតិលីបង់ជាច្រើនដែលបានជ្រកកោននៅក្នុងទីក្រុងបេរូត និងកន្លែងផ្សេងៗ បានចាប់ផ្តើមធ្វើដំណើរទៅកាន់តំបន់ចុងភាគខាងត្បូង ដូចជា ស៊ូដុន (Sidon) ថាយរ៉េ (Tyre) និង ជ្រលងបេកាអា (Bekaa Valley) ដោយអ្នកខ្លះថែមទាំងព្យាយាមត្រឡប់ទៅតំបន់ភាគខាងត្បូងនៃទន្លេ លីតានី (Litani) ជាទីដែលកងកម្លាំងអ៊ីស្រាអែល នៅតែរក្សាវត្តមាន។

យោងតាមរបាយការណ៍របស់ធនាគារពិភពលោក ចាប់តាំងពីជម្លោះរវាងលីបង់ និងអ៊ីស្រាអែល បានចាប់ផ្តើមនៅក្នុងខែតុលាឆ្នាំមុនមក ការវាយប្រហាររបស់អ៊ីស្រាអែល បានបំផ្លាញភូមិចំនួន ៣៧ នៅលីបង់ បង្កការខូចខាតផ្នែកខ្លះ ឬទាំងស្រុងដល់លំនៅឋានជាង ៩៩.០០០ខ្នង និងបានជម្លៀសប្រជាជនជាង ១,២លាននាក់។ ជម្លោះនេះបានធ្វើឱ្យស្ថានការណ៍ដ៏អាក្រក់រួចទៅហើយរបស់លីបង់ កាន់តែធ្ងន់ធ្ងរឡើងថែមទៀត ដែលធ្វើឱ្យប្រទេសនេះជួបផ្លូវដ៏វែងឆ្ងាយ និងលំបាកក្នុងការស្តារឡើងវិញ៕