មេដឹកនាំកោះតៃវ៉ាន់ លោក Lai Ching-te បាននិយាយកាលពីថ្ងៃសៅរ៍ (៣០ វិច្ឆិកា) នៅកោះហាវ៉ៃថា ពុំមានអ្នកឈ្នះនៅក្នុងសង្រ្គាមទេ ហើយសន្តិភាពគឺមានតម្លៃមិនអាចកាត់ថ្លៃបាន ខណៈប្ដេជ្ញាបញ្ចៀសជម្លោះ បន្ទាប់ពីបានទៅកាន់វិមានអនុស្សាវរីយ៍ចំពោះការវាយប្រហារលើកំពង់ផែ ភើល ហាប៊័រ (Pearl Harbor) ក្នុងដំណើរទៅកាន់សហរដ្ឋអាមេរិក ដែលបានធ្វើឱ្យទីក្រុងប៉េកាំងខឹងសម្បារ។

លោក Lai កំពុងធ្វើដំណើរដ៏រសើបរយៈពេលពីរថ្ងៃទៅកាន់កោះហាវ៉ៃ ដែលបានប្រកាសជាផ្លូវការថាគ្រាន់តែជាការឈប់សំចតប៉ុណ្ណោះ តាមផ្លូវទៅកាន់ប្រទេសកោះប៉ាស៊ីហ្វិកចំនួន៣ ដែលរក្សាទំនាក់ទំនងផ្លូវការជាមួយកោះតៃវ៉ាន់ ដែលប្រទេសចិន អះអាងសិទ្ធិថាជាទឹកដីរបស់ខ្លួន។

លោក Lai បាននិយាយជាភាសាអង់គ្លេសទៅកាន់សហគមន៍តៃវ៉ាន់នៅបរទេស និងអ្នកនយោបាយហាវ៉ៃថា "ដំណើរទស្សនកិច្ចរបស់យើងទៅកាន់កន្លែងរំលឹកវិញ្ញាណក្ខន្ធក្នុងថ្ងៃនេះ រំលឹកជាពិសេសដល់សារៈសំខាន់នៃការធានាសន្តិភាព។ សន្តិភាពគឺមានតម្លៃមិនអាចកាត់ថ្លៃបាន ហើយសង្រ្គាមគ្មានអ្នកឈ្នះទេ ដូចនេះយើងត្រូវប្រយុទ្ធតស៊ូជាមួយគ្នាដើម្បីទប់ស្កាត់ និងបញ្ចៀសសង្គ្រាម" ។ 

ក្នុងពេលដែលលោក Lai កំពុងចូលរួមក្នុងព្រឹត្តិការណ៍នោះ ប្រទេសចិន បានដាក់ការតវ៉ាទៅកាន់ទីក្រុងវ៉ាស៊ីនតោន ចំពោះការរៀបចំដំណើរឆ្លងកាត់របស់មេដឹកនាំតៃវ៉ាន់រូបនេះតាមរយៈទឹកដីអាមេរិក។ 

ប្រភពសន្តិសុខបានប្រាប់សារព័ត៌មានរ៉យទ័រថា ចិនអាចធ្វើហ្គេមសង្រ្គាមជុំថ្មីនៅជុំវិញកោះតៃវ៉ាន់ ដើម្បីឆ្លើយតបទៅនឹងដំណើរទស្សនកិច្ចរបស់លោក Lai ដែលជាដំណើរទៅក្រៅប្រទេសលើកដំបូងរបស់ខ្លួនចាប់តាំងពីចូលកាន់តំណែងក្នុងខែឧសភា ក្រោយឈ្នះឆ្នោតកាលពីខែមករា៕