ក្រុមមន្ត្រីក្នុងតំបន់បាននិយាយថា ការប៉ះទង្គិចគ្នារវាងក្រុមនិកាយដែលជាគូជម្លោះ បានបន្តនៅក្នុងស្រុក គូរ៉ាម (Kurram) ភាគពាយព្យនៃប្រទេសប៉ាគីស្ថាន បើទោះបីជាមានបទឈប់បាញ់មួយបានកើតឡើងកាលពីចុងសប្តាហ៍មុនក៏ដោយ ដោយចំនួនអ្នកស្លាប់ឥឡូវនេះមានលើសពី ១៣០នាក់ ខណៈអាជ្ញាធរព្យាយាមចរចារកដំណោះស្រាយ។

ស្រុក Kurram នៅជិតព្រំដែនជាមួយអាហ្វហ្គានីស្ថាន គឺជាចំណុចដ៏ក្ដៅគគុកមួយនៃភាពតានតឹងផ្នែកនិកាយអស់រយៈពេលជាច្រើនទសវត្សរ៍មកហើយ។ ជម្លោះនេះបានរាលដាលក្លាយជារលកនៃការវាយប្រហារថ្មីមួយកាលពីខែមុន នៅពេលដែលការប៉ះទង្គិចរវាងក្រុមប្រដាប់អាវុធនៃនិកាយស៊ុននី និងនិកាយស៊ីអ៊ីត បានបណ្តាលឱ្យមនុស្សរាប់សិបនាក់ស្លាប់។

មន្ត្រីរដ្ឋបាលស្រុក លោក វ៉ាជីត ហ៊ូសៃអាន (Wajid Hussain) បាននិយាយថា មនុស្ស ១៣៣នាក់ត្រូវបានសម្លាប់នៅក្នុងការវាយប្រហារនោះ។ លោកបន្តថា៖ «រដ្ឋបាលស្រុក និងអាជ្ញាធរពាក់ព័ន្ធផ្សេងទៀតបានផ្ដួចផ្ដើមកិច្ចខិតខំប្រឹងប្រែងដើម្បីបញ្ឈប់ការប្រយុទ្ធគ្នារវាងភាគីជម្លោះទាំងពីរ ប៉ុន្តែមិនទាន់មានផ្លែផ្កានៅឡើយទេ»។

គួររម្លឹកថា ក្រុមរដ្ឋាភិបាលប៉ាគីស្ថាន បានសម្រុះសម្រួលកិច្ចព្រមព្រៀងឈប់បាញ់រយៈពេល ៧ថ្ងៃរវាងក្រុមគូប្រជែងទាំងពីរកាលពីថ្ងៃអាទិត្យមុន ប៉ុន្តែជម្លោះនៅតែបន្ត។ ក្រុមប្រដាប់អាវុធនិកាយស៊ីអ៊ីត និងនិកាយស៊ុននី បានចូលរួមក្នុងការប្រជែងគ្នារវាងកុលសម្ព័ន្ធ និងនិកាយអស់រយៈពេលជាច្រើនទស្សវត្ស ជុំវិញជម្លោះដីធ្លី និងជម្លោះក្នុងតំបន់ផ្សេងទៀតនៅស្រុក Kurram ដ៏ហិង្សា៕