ក្រុមឃ្លាំមើលសង្គ្រាមបាននិយាយថា កងកម្លាំងរដ្ឋាភិបាលបានបាត់បង់ការគ្រប់គ្រងទីក្រុង អាឡេប៉ូ (Aleppo)ដែលជាទីក្រុងទីពីររបស់ប្រទេសស៊ីរី កាលពីថ្ងៃអាទិត្យទី១ខែធ្នូចុងសប្ដាហ៍នេះ ជាលើកដំបូងចាប់តាំងពីជម្លោះស៊ីវិលរបស់ប្រទេសនេះបានចាប់ផ្តើម បន្ទាប់ពីការវាយលុកយ៉ាងខ្លាំង ដែលប៉ះពាល់ធ្ងន់ធ្ងរដល់លោកប្រធានាធិបតី Bashar al-Assad ។

សម្ព័ន្ធឧទ្ទាមបានបើកការវាយលុកទៅលើកងកម្លាំងរបស់រដ្ឋាភិបាលគាំទ្រដោយអ៊ីរ៉ង់ និងរុស្ស៊ីកាលពីថ្ងៃពុធ សប្ដាហ៍មុន នៅចំថ្ងៃ ដែលបទឈប់បាញ់ដ៏ផុយស្រួយបានចូលជាធរមាននៅក្នុងប្រទេសលីបង់ជិតខាង រវាងអ៊ីស្រាអែល និងក្រុមហេសបូឡា គាំទ្រដោយអ៊ីរ៉ង់ បន្ទាប់ពីសង្គ្រាមទ្រង់ទ្រាយធំអស់រយៈពេលពីរខែ។

លោក Rami Abdel Rahman ប្រធានក្រុមឃ្លាំមើលសិទ្ធិមនុស្សស៊ីរីដែលមានមូលដ្ឋាននៅចក្រភពអង់គ្លេសបានប្រាប់សារព័ត៌មាន AFP ថា ក្រុមជីហាដ Hayat Tahrir al-Sham (HTS) និងបក្សពួកសម្ព័ន្ធមិត្តឥឡូវនេះ គ្រប់គ្រងទីក្រុង Aleppo លើកលែងតែសង្កាត់នានាដែលគ្រប់គ្រងដោយកងកម្លាំងឃឺដ។

លោកបាននិយាយថាជាលើកដំបូងចាប់តាំងពីសង្គ្រាមស៊ីវិលបានចាប់ផ្តើមជាងមួយទសវត្សរ៍មកនេះ ទីក្រុងអាឡេប៉ូ នៅក្រៅការគ្រប់គ្រងរបស់កងកម្លាំងរបបស៊ីរី។

ក្រុមឃ្លាំមើលសង្រ្គាមខាងលើបាននិយាយថា យន្តហោះរបស់រុស្ស៊ីបានបើកការវាយប្រហារយ៉ាងចាស់ដៃកាលពីថ្ងៃអាទិត្យ ដើម្បីគាំទ្រកងកម្លាំងរបស់រដ្ឋាភិបាល។

ក្រុមនេះបាននិយាយថាមនុស្សយ៉ាងហោចណាស់៥នាក់បានស្លាប់នៅពេលការវាយប្រហារតាមអាកាសរបស់រុស្ស៊ី ចំនួន ៤លើក ផ្ដោតគោលដៅលើទីលាចតុរង្គក្បែរសាកលវិទ្យាល័យអាឡេប៉ូ៕