ក្រុមបាតុករ និងកងកម្លាំងនគរបាលបានប៉ះទង្គិចគ្នាក្នុងរដ្ឋធានី ទីប៊ីលីស៊ី(Tbilisi) របស់ប្រទេសហ្ស៊កហ្ស៊ី នៅយប់ទី៤ជាប់គ្នា ដោយអូសបន្លាយរហូតដល់ព្រឹកថ្ងៃចន្ទ ទី២ ខែធ្នូ នេះ អមដោយសញ្ញានានាថា ប្រឆាំងទៅនឹងការសម្រេចចិត្តរបស់រដ្ឋាភិបាលក្នុងការផ្អាកកិច្ចពិភាក្សាស្តីពីការចូលជាសមាជិកសហភាពអឺរ៉ុប បានរីករាលដាលពាសពេញប្រទេស។ 

ភាពតានតឹងបានកើនឡើងជាច្រើនខែនៅក្នុងប្រទេសដែលមានប្រជាជន៣,៧លាននាក់រវាងគណបក្សកាន់អំណាច ក្ដីស្រមៃហ្ស៊កហ្ស៊ី(Georgian Dream)និងក្រុមប្រឆាំងដែលចោទប្រកាន់ថាបក្សកាន់អំណាចថា កំពុងបន្តគោលនយោបាយប្រឆាំងលោកខាងលិច និងគាំទ្ររុស្ស៊ីកាន់តែខ្លាំង។

វិបត្តិកប់កាន់តែជ្រៅចាប់តាំងពីការប្រកាសកាលពីថ្ងៃព្រហស្បតិ៍២៨ វិច្ឆិកា ដែលថារដ្ឋាភិបាលនឹងបង្កកកិច្ចចរចារបស់សហភាពអឺរ៉ុបរយៈពេល ៤ ឆ្នាំ ដោយមានបាតុករគាំទ្រសហភាពអឺរ៉ុបរាប់ពាន់នាក់ប្រឈមនឹងកងកម្លាំងនគរបាលប្រដាប់ដោយឧស្ម័នបង្ហូរទឹកភ្នែក និងកាណុងបាញ់ទឹក។

ក្រុមបាតុករបានប្រមូលផ្តុំគ្នាម្តងទៀតក្នុងរដ្ឋធានីនេះ កាលពីយប់ថ្ងៃអាទិត្យ ទី១ធ្នូ នៅកណ្តាលទីលាន រ៉ាស្តាវ៉េលី អេវិននូ (Rustaveli Avenue) ដោយបាញ់កាំជ្រួចទៅលើកងកម្លាំងនគរបាល ដែលបានឆ្លើយតបដោយកាណុងបាញ់ទឹក។

បន្ទាប់ពីពាក់កណ្តាលអធ្រាត្រ ក្រោយមានការប្រឈមដាក់គ្នាជាច្រើនម៉ោង នគរបាលបានចាប់ផ្តើមរុញច្រានក្រុមបាតុករចេញពីអគារសភា ឆ្ពោះទៅកាន់រោងមហោស្រពទីប៊ីលីស៊ី ជាទីដែលក្រុមបាតុការនៅតែបន្តសកម្មភាពតវ៉ា ៕