ទីប្រឹក្សាសន្តិសុខជាតិរបស់សេតវិមាន លោក Jake Sullivan បាននិយាយកាលពីថ្ងៃអាទិត្យ (០១ ធ្នូ) ថា សហរដ្ឋអាមេរិក មិនពិចារណាប្រគល់អាវុធនុយក្លេអ៊ែរត្រឡប់ឱ្យអ៊ុយក្រែនវិញឡើយ ដែលទីក្រុងគីវ បានបោះបង់ចោលក្រោយសហភាពសូវៀតដួលរលំ។

លោក Sullivan បានលើកឡើងបែបនេះ នៅពេលត្រូវសាកសួរពីអត្ថបទរបស់សារព័ត៌មាន New York Times កាលពីខែមុន ដែលរាយការណ៍ថា ប្រភពពីក្រុមមន្ត្រីលោកខាងលិចមួយចំនួនបានបង្ហើបថា ប្រធានាធិបតីសហរដ្ឋអាមេរិក លោក Joe Biden អាចឱ្យអាវុធនុយក្លេអ៊ែរទៅអ៊ុយក្រែន មុនពេលលោកចាកចេញពីតំណែង។

លោក Sullivan បានប្រាប់សារព័ត៌មាន ABC ថា "រឿងនោះមិនស្ថិតក្នុងការពិចារណារបស់យើងទេ។ អ្វីដែលអាមេរិកកំពុងធ្វើគឺបង្កើនសមត្ថភាពធម្មតាផ្សេងៗដល់អ៊ុយក្រែន ដើម្បីអាចការពារខ្លួនប្រកបដោយប្រសិទ្ធភាព និងប្រយុទ្ធជាមួយរុស្ស៊ី មិនមែនផ្តល់ឱ្យទីក្រុងគីវ នូវសមត្ថភាពនុយក្លេអ៊ែរឡើយ"។

កាលពីសប្តាហ៍មុន រុស្ស៊ីបាននិយាយថា គំនិតអាវុធនុយក្លេអ៊ែរនេះគឺ "ឆ្កួតលីលាយ៉ាងខ្លាំង" ហើយបន្ថែមថា ការទប់ស្កាត់សេណារីយ៉ូបែបនេះហើយ គឺជាហេតុផលមួយក្នុងចំណោមហេតុផលជាច្រើនដែលទីក្រុងមូស្គូ បញ្ជូនកងទ័ពចូលអ៊ុយក្រែន។

គួររម្លឹកថា ទីក្រុងគីវ ទទួលបានអាវុធនុយក្លេអ៊ែរពីសហភាពសូវៀត បន្ទាប់ពីការដួលរលំនៅឆ្នាំ១៩៩១ ប៉ុន្តែបានបោះបង់ចោលនៅក្រោមកិច្ចព្រមព្រៀងឆ្នាំ១៩៩៤ ក្នុងអនុស្សរណៈទីក្រុងប៊ុយដាប៉ែស ជាថ្នូរនឹងការធានាសន្តិសុខពីរុស្ស៊ី សហរដ្ឋអាមេរិក និងចក្រភពអង់គ្លេស៕