យោងតាមមន្ត្រីសុខាភិបាលក្នុងតំបន់ មនុស្សយ៉ាងហោចណាស់ ២០០នាក់ត្រូវបានសម្លាប់ក្នុងការវាយប្រហារតាមអាកាសរបស់អ៊ីស្រាអែលនៅភាគខាងជើងតំបន់ហ្កាហ្សាកាលពីថ្ងៃសៅរ៍   ខណៈអង្គការសហប្រជាជាតិបាននិយាយថា ខ្លួននឹងផ្អាកការផ្តល់ជំនួយតាមរយៈច្រកឆ្លងកាត់ដ៏សំខាន់នៃតំបន់នេះ បន្ទាប់ពីរថយន្តដឹកជំនួយជាច្រើនរបស់ខ្លួនត្រូវបានលួច។

ដំណឹងនេះបានគូសបញ្ជាក់អំពីស្ថានភាពមនុស្សធម៌ដែលកាន់តែយ៉ាប់យ៉ឺននៅក្នុងដែនដីឡោមព័ទ្ធដោយអ៊ីស្រាអែលមួយនេះ ជាទីដែលមនុស្សរាប់ម៉ឺននាក់ត្រូវបានសម្លាប់ដោយយោធាអ៊ីស្រាអែល ហើយភាពអត់ឃ្លានរ៉ាំរ៉ៃ បានគំរាមកំហែងដល់ប្រជាជនស៊ីវិលដែលនៅសេសសល់។ កាលពីថ្ងៃសុក្រ កុមារពីរនាក់ និងស្ត្រីម្នាក់ត្រូវបានប្រជ្រៀតគ្នារហូតដល់ស្លាប់ ខណៈកំពុងព្យាយាមទិញអាហារពីហាងនំប៉័ងមួយនៅកណ្តាលក្រុងហ្កាហ្សា។

ការវាយប្រហារដ៏សាហាវនេះក៏កើតមានស្របគ្នានឹងបទឈប់បាញ់ដ៏ផុយស្រួយ ដែលកំពុងដំណើរការរវាងអ៊ីស្រាអែល និងក្រុមហេសបូឡា នៅក្នុងប្រទេសលីបង់ ផងដែរ ដែលនាយករដ្ឋមន្ត្រីអ៊ីស្រាអែលលោក Benjamin Netanyahu បាននិយាយថានឹងអនុញ្ញាតឱ្យកងកម្លាំងរបស់លោកផ្តោតលើតំបន់ហ្កាហ្សាវិញម្ដង។

ថ្លែងទៅកាន់ទូរទស្សន៍ CNN កាលពីថ្ងៃអាទិត្យ លោកវេជ្ជបណ្ឌិត Hussam Abu Safiya នាយកមន្ទីរពេទ្យ Kamal Adwan នៅហ្កាហ្សាបាននិយាយថា អគារចំនួនប្រាំដែលជាលំនៅដ្ឋានសម្រាប់មនុស្សជាង២០០ នាក់ត្រូវបានវាយប្រហារនៅតំបន់ Tal Al Zaatar និងតំបន់ Beit Lahiya ភាគខាងជើងដែនដីហ្កាហ្សា៕