សេវាសង្គ្រោះដែលគ្រប់គ្រងដោយក្រុមប្រឆាំងស៊ីរី ឈ្មោះថា White Helmets បាននិយាយនៅព្រឹកថ្ងៃចន្ទ (០២ ធ្នូ) នេះថា យ៉ាងហោចណាស់មនុស្ស ២៥នាក់ ត្រូវបានសម្លាប់នៅភាគពាយព្យប្រទេសស៊ីរីក្នុងការវាយប្រហារតាមអាកាសដែលធ្វើឡើងដោយរដ្ឋាភិបាលស៊ីរី និងរុស្ស៊ី។

ប្រភពយោធាបាននិយាយថា យន្តហោះរុស្ស៊ី និងស៊ីរី បានវាយប្រហារទីក្រុង អ៊ីដលីប (Idlib) ដែលគ្រប់គ្រងដោយក្រុមឧទ្ទាម នៅភាគខាងជើងស៊ីរី កាលពីថ្ងៃអាទិត្យ ខណៈលោកប្រធានាធិបតី បាសា អាល់-អាសាដ (Bashar al-Assad) បានប្តេជ្ញាកម្ទេចក្រុមឧទ្ទាម ដែលបានវាយលុកចូលទីក្រុង អាឡិបប៉ូ (Aleppo)។

កងទ័ពក៏និយាយផងដែរថា ខ្លួនបានដណ្តើមយកទីប្រជុំជនជាច្រើនមកវិញ ដែលក្រុមឧទ្ទាមបានវាយលុកក្នុងរយៈពេលប៉ុន្មានថ្ងៃថ្មីៗនេះ។ អ្នកស្រុកនិយាយថា ការវាយប្រហារមួយបានកើតឡើងតំបន់លំនៅដ្ឋានដែលមានមនុស្សរស់នៅកុះករនៅកណ្តាលទីក្រុង Idlib ដែលជាទីក្រុងធំបំផុតនៅក្នុងជំរំក្រុមឧទ្ទាមក្បែរព្រំដែនទួរគី ដែលមានមនុស្សប្រហែល ៤លាននាក់រស់នៅក្នុងតង់ និងជំរំបណ្តោះអាសន្ន។

ក្រុម White Helmets និយាយថា កុមារ ១០នាក់ស្ថិតក្នុងចំណោមអ្នកស្លាប់ទាំងនោះ ក្នុងការវាយប្រហារតាមអាកាសទាំងនៅក្នុង និងជុំវិញទីក្រុង Idlib និងគោលដៅផ្សេងទៀតនៅក្នុងទឹកដីដែលកាន់កាប់ដោយក្រុមឧទ្ទាមនៅជិតទីក្រុង Aleppo កាលពីថ្ងៃអាទិត្យ។

ក្រុមនេះបានបន្ថែមនៅក្នុងសេចក្តីថ្លែងការណ៍មួយនៅលើបណ្ដាញសង្គម X ថា ចំនួនអ្នកស្លាប់សរុបពីការវាយប្រហាររបស់ស៊ីរី និងរុស្ស៊ី ចាប់តាំងពីថ្ងៃទី២៧ ខែវិច្ឆិកា មក បានកើនឡើងដល់ ៥៦នាក់ ក្នុងនោះមានកុមារ ២០នាក់៕