កិច្ចប្រជុំកំពូល នៃក្រុមប្រឹក្សាសហប្រតិបត្តិការតំបន់ឈូងសមុទ្រ (GCC) បានជំរុញឱ្យមានបទឈប់បាញ់បន្ទាន់នៅតំបន់ហ្កាហ្សា កាលពីថ្ងៃអាទិត្យ ទី១ខែធ្នូ បន្ទាប់ពីការអំពាវនាវឱ្យមានបទឈប់បាញ់ពីសំណាក់ប្រទេសម្ចាស់ផ្ទះគឺប្រទេសគុយវ៉ែត ក្រោយសង្រ្គាមរយៈពេលជិត១៤ខែ នៅក្នុងដែនដីប៉ាឡេស្ទីន។

នៅក្នុងសេចក្តីថ្លែងការណ៍ចុងក្រោយនៃកិច្ចប្រជុំ អង្គការដែលមានសមាជិក៦ប្រទេស បានអំពាវនាវឱ្យ «បញ្ឈប់ជាបន្ទាន់ និងជាអចិន្ត្រៃយ៍នៃប្រតិបត្តិការយោធា និងការបាញ់ផ្លោងរបស់អ៊ីស្រាអែល» ព្រមទាំង «ត្រូវផ្តល់ជំនួយមនុស្សធម៌ និងជំនួយសង្គ្រោះ និងតម្រូវការចាំបាច់ជាមូលដ្ឋានផ្សេងទៀតដល់ប្រជាជននៅតំបន់ហ្កាហ្សា»។

កិច្ចប្រជុំនេះ ធ្វើឡើងនៅពេលនៃភាពមិនច្បាស់លាស់ និងកំពុងបន្តកើតឡើងសម្រាប់តំបន់មជ្ឈិមបូព៌ា បន្ទាប់ពីការវាយប្រហារថ្ងៃទី៧ ខែតុលា ឆ្នាំ២០២៣ របស់ក្រុមហាម៉ាសទៅលើអ៊ីស្រាអែល និងសង្រ្គាមជាបន្តបន្ទាប់នៅតំបន់ហ្កាហ្សា។

កាលពីពេលមុន ប្រទេសគុយវ៉ែត បានអំពាវនាវឱ្យសហគមន៍អន្តរជាតិអនុវត្ត «បទឈប់បាញ់បន្ទាន់ និងផ្តល់ការការពារជាអន្តរជាតិសម្រាប់ជនស៊ីវិលស្លូតត្រង់ និងធានាបានការបើកច្រករបៀងសុវត្ថិភាព និងការទៅដល់នៃជំនួយមនុស្សធម៌ជាបន្ទាន់» ។

ប្រទេសគុយវ៉ែត មានសុទិដ្ឋិនិយមអំពីបទឈប់បាញ់ដែលបានព្រមព្រៀងគ្នារវាងអ៊ីស្រាអែល និងក្រុមហេសបូឡា នៅក្នុងប្រទេសលីបង់ ដែលលោកបាននិយាយថានឹងរួមចំណែក ដល់ ការកាត់បន្ថយការរីកធំជម្លោះនៅក្នុងតំបន់។