ក្រុមអ្នកឃ្លាំមើលសង្គ្រាម បានរាយការណ៍ថា ក្រុមគាំទ្រដោយប្រទេសទួរគី កាលពីថ្ងៃអាទិត្យបានបើកការវាយលុកលើតំបន់កាន់កាប់ដោយក្រុមឃឺដក្នុងខេត្តអាឡេបប៉ូភាគខាងជើង ដែលនាំទៅរកភាពឯកោនៃជនជាតិឃឺដស៊ីរីជាង ២០០.០០០នាក់។

អង្គការឃ្លាំមើលសិទ្ធិមនុស្សស៊ីរី បាននិយាយថា ការវាយប្រហារនេះ ត្រូវបានគេដាក់ឈ្មោះថា «ប្រតិបត្តិការដើមដំបូងនៃសេរីភាព» បានផ្តោតគោលដៅលើតំបន់ជនបទភាគខាងជើងទីក្រុងអាឡេបប៉ូ ដែលមានប្រជាជនឃឺដស៊ីរី ជាង២០០.០០០នាក់ រស់នៅ។

ក្រុមសង្កេតការណ៍ បាននិយាយថា កងកម្លាំងគាំទ្រដោយទួរគី ដែលកំពុងធ្វើប្រតិបត្តិការ បានដណ្តើមយកតំបន់ជាច្រើន រួមទាំងទីក្រុង Tel Rifaat និងបានដាក់ការហ៊ុមព័ទ្ធនៅកន្លែងផ្សេងទៀត ដោយកាត់ផ្តាច់ផ្លូវជាច្រើនកន្លែង និងបានរារាំងជនស៊ីវិលមិនឲ្យភៀសខ្លួនទៅកាន់ទីសុវត្ថិភាព។

ក្រុមអ្នកស៊ើបអង្កេត បាននិយាយថា ការវាយប្រហារនេះ ក៏រួមមានទាំងការកាត់ផ្តាច់ទំនាក់ទំនង ដែលធ្វើឱ្យអ្នកស្រុកពុំអាចទៅដល់ពិភពខាងក្រៅបាន។

ក្នុងការឆ្លើយតប រដ្ឋបាលស្វយ័តក្រុមឃឺដនៅភាគខាងជើងប្រទេសស៊ីរី បានប្រកាសការចល័តជាទូទៅដើម្បីទប់ទល់ជាមួយកងកម្លាំងដែលកំពុងវាយរុលចូលទៅមុខ។

ទីក្រុង Tel Rifaat និងតំបន់ជុំវិញរបស់ទីក្រុងនេះ ស្ថិតនៅក្រោមការគ្រប់គ្រងរបស់ក្រុមឃឺដ ចាប់តាំងពីឆ្នាំ២០១៦ ហើយបានក្លាយជាទីជម្រកសម្រាប់ជនជាតិឃឺដដែលភៀសខ្លួនដោយប្រតិបត្តិការយោធារបស់ប្រទេសទួរគី កាលពីពេលមុន។