សារព័ត៌មានក្នុងស្រុករាយការណ៍ថា មនុស្សរាប់សិបនាក់បានស្លាប់នៅក្នុងការជាន់គ្នា បន្ទាប់ពីការប៉ះទង្គិចនៅឯការប្រកួតកីឡាបាល់ទាត់មួយនៅទីក្រុង អ៊ិនហ្សេរ៉េកូរ៉េ (N'zérékoré) ធំបំផុតទីពីររបស់ប្រទេសហ្គីណេ។

លោកនាយករដ្ឋមន្ត្រី ម៉ាម៉ាដូ អ៊ូរីបា (Mamadou Oury Bah) បាននិយាយថា ការរត់ជាន់គ្នានៅក្នុងព្រឹត្តិការណ៍នេះ បាននាំឱ្យជនរងគ្រោះជាច្រើននាក់កាលពីថ្ងៃអាទិត្យ (០១ ធ្នូ) ហើយបានអំពាវនាវឱ្យមានភាពស្ងប់ស្ងាត់។

វេជ្ជបណ្ឌិតម្នាក់ដែលសុំមិនបញ្ចេញឈ្មោះ បានប្រាប់ទីភ្នាក់ងារព័ត៌មាន AFP ថា មានសាកសពជាច្រើន "ត្រៀបត្រា" នៅមន្ទីរពេទ្យក្នុងស្រុក ហើយកន្លែងតម្កល់សពពោរពេញដោយអ្នកស្លាប់។

ប្រព័ន្ធផ្សព្វផ្សាយក្នុងស្រុកបាននិយាយថា នគរបាលបានប្រើឧស្ម័នបង្ហូរទឹកភ្នែក បន្ទាប់ពីអ្នកគាំទ្រក្រុមបាល់ទាត់ ឡាបេ (Labé) បានគប់ដុំថ្មឆ្ពោះទៅទីលានដោយកំហឹងដាក់អាជ្ញាកណ្តាល។ រហូតមកដល់ពេលនេះ មិនទាន់មានតួលេខអ្នកស្លាប់ជាផ្លូវការនៅឡើយទេ។

សាក្សីម្នាក់បានប្រាប់ AFP ថា៖ "រឿងទាំងអស់បានចាប់ផ្តើមដោយការសម្រេចចិត្តមិនល្អរបស់អាជ្ញាកណ្តាល បន្ទាប់មកអ្នកគាំទ្រសម្រុកចូលទីលានប្រកួត»។ គេហទំព័រព័ត៌មានក្នុងស្រុក MediaGuinee បានរាយការណ៍ថា អ្នកទស្សនារាប់ពាន់នាក់មានវត្តមាននៅពេលដែលការប៉ះទង្គិចបានកើតឡើង នៅក្នុងការប្រកួតរវាងក្រុមបាល់ទាល់ហ្គីណេចំនួនពីរ គឺក្រុមម្ចាស់ផ្ទះ N'zérékoré ប៉ះក្រុមភ្ញៀវ Labé មកពីក្រៅទីក្រុង៕