ក្រុមហ៊ួទីនៅប្រទេសយេម៉ែន បានប្រកាសកាលពីថ្ងៃអាទិត្យថា ខ្លួនបានកំណត់គោលដៅលើនាវាពិឃាតរបស់សហរដ្ឋអាមេរិក និងនាវាផ្គត់ផ្គង់យោធាចំនួនបីគ្រឿង នៅក្នុង «ប្រតិបត្តិការយោធារួមមួយនិងប្រកបដោយគុណភាព។ នេះបើយោងតាមសេចក្តីថ្លែងការណ៍ដែលចេញផ្សាយដោយទូរទស្សន៍ Masirah របស់ក្រុមហ៊ួទី។

អ្នកនាំពាក្យយោធាក្រុមហ៊ួទី លោក Yahya Sarea បាននិយាយថា៖«យើងបានធ្វើប្រតិបត្តិការមួយ ដោយកំណត់គោលដៅលើនាវាពិឃាតអាមេរិក និងនាវាផ្គត់ផ្គង់ចំនួន បីគ្រឿង ដែលជាកម្មសិទ្ធិរបស់យោធាសហរដ្ឋអាមេរិក»។ លោកបានកំណត់អត្តសញ្ញាណនាវាផ្គត់ផ្គង់ថា «The Stena Impeccable, Maersk Saratoga, និង Liberty Grace» ប៉ុន្តែមិនបានបង្ហាញឈ្មោះរបស់នាវាពិឃាតដែលត្រូវកំណត់គោលដៅនោះទេ។

លោក Sarea បានអះអាងថា ប្រតិបត្តិការនេះ ធ្វើឡើងនៅសមុទ្រអារ៉ាប់ និងឈូងសមុទ្រ Aden ពាក់ព័ន្ធនឹងមីស៊ីលបាលីស្ទីក និងមីស៊ីលដែលមានស្លាបចំនួន ១៦គ្រឿង និងយានដ្រូនមួយគ្រឿង។ លោកបានពណ៌នាអំពីការវាយប្រហារនេះថា ជា «ត្រូវចំគោលដៅយ៉ាងជាក់លាក់»។

លោក Sarea បានព្រមានថា ក្រុមហ៊ួទី នឹងបង្កើនប្រតិបត្តិការរបស់ពួកគេ នៅក្នុងតំបន់ប្រតិបត្តិការដែន សមុទ្រដែលបានប្រកាស ដោយគ្របដណ្តប់លើសមុទ្រក្រហម និងសមុទ្រអារ៉ាប់ រហូតដល់អ៊ីស្រាអែលបញ្ឈប់សកម្មភាពរបស់ខ្លួន នៅតំបន់ហ្កាហ្សា។ លោកបាននិយាយថា៖«យើងនឹងបន្តធ្វើប្រតិបត្តិការយោធា ក្នុងល្បឿនកាន់តែខ្លាំងប្រឆាំងនឹងអ៊ីស្រាអែល និងសហរដ្ឋអាមេរិក»។