រដ្ឋមន្ត្រីការបរទេសអាល្លឺម៉ង់លោកស្រី Annalena Baerbock បានចោទប្រកាន់ចិនថា បានផ្តល់អាវុធដល់រុស្ស៊ី សម្រាប់សង្គ្រាមប្រឆាំងនឹងអ៊ុយក្រែន និងគំរាមកំហែងសន្តិភាព នៅតំបន់អឺរ៉ុប និងឥណ្ឌូ-ប៉ាស៊ីហ្វិក។

នៅក្នុងសេចក្តីថ្លែងការណ៍មួយ កាលពីថ្ងៃអាទិត្យ (ទី១ ខែធ្នូ) ពោលគឺនៅមុនដំណើរទស្សនកិច្ចទៅកាន់ទីក្រុងប៉េកាំង លោកស្រី Baerbock បាននិយាយថា៖ «ជំនួសឲ្យការទទួលខុសត្រូវ ចំពោះសន្តិភាព និងសន្តិសុខ នៅក្នុងពិភពលោក ក្នុងនាមជាសមាជិកអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិ ប្រទេសចិនកំពុងប្រឆាំងនឹងផលប្រយោជន៍ស្នូលនៃសហគមអឺរ៉ុបរបស់យើង ដោយការផ្ដល់ជំនួយផ្នែកសេដ្ឋកិច្ច និងអាវុធដល់ប្រទេសរុស្ស៊ី»។

គួរបញ្ជាក់ថា រដ្ឋមន្ត្រីការបរទេសអាល្លឺម៉ង់រូបនេះ នឹងធ្វើដំណើរទៅកាន់ប្រទេសចិន ក្នុងសប្តាហ៍នេះ ជាកន្លែងដែលលោកស្រីនឹងជួបសមភាគីចិនរបស់លោកស្រី គឺលោក Wang Yi ដើម្បីពិភាក្សាអំពីបញ្ហានានា ក្នុងនោះរួមទាំងសង្គ្រាមនៅអ៊ុយក្រែនផងដែរ។

លោកស្រី Baerbock បានប្រាប់បន្តថា៖ «សង្រ្គាមលុកលុយរបស់លោក (Vladimir) Putin លើអ៊ុយក្រែន គឺជាការគំរាមកំហែងដោយផ្ទាល់ ចំពោះសន្តិភាពរបស់យើង។ ហើយនៅទីក្រុងប៉េកាំង ខ្ញុំក៏នឹងនិយាយអំពីការពិត ដែលថា យើងមិនអាចព្រងើយកន្តើយ ចំពោះរឿងនេះបានទេ នៅក្នុងទំនាក់ទំនងរបស់យើងជាមួយប្រទេសចិន»។

ជាមួយគ្នានេះ លោកស្រីបានកត់សម្គាល់បន្ថែមថា សង្រ្គាម នៅអ៊ុយក្រែន បង្ហាញឲ្យឃើញថា តើសន្តិសុខ នៅអឺរ៉ុប ត្រូវបានផ្សារភ្ជាប់ទៅនឹងទំនាក់ទំនងមិនដាច់ស្រេចជាមួយនឹងបញ្ហានោះ នៅតំបន់អាស៊ី៕