រដ្ឋមន្ត្រីការបរទេស នៅថ្ងៃចន្ទ (ទី២ ខែធ្នូ) នេះ បាននិយាយថា ប្រទេសឥណ្ឌូនេស៊ីមិនទាន់សម្រេចចិត្តនៅឡើយទេ ពាក់ព័ន្ធទៅនឹងតំបន់អភិវឌ្ឍន៍រួមណាមួយ ជាមួយប្រទេសចិន នៅសមុទ្រចិនខាងត្បូង ដោយប្រឹងប្រែងសម្រាលដល់ការព្រួយបារម្ភ ដែលថា កិច្ចព្រមព្រៀងនាពេលថ្មីៗនេះ ជាមួយទីក្រុងប៉េកាំង អាចធ្វើឲ្យខូចដល់អធិបតេយ្យភាពរបស់ខ្លួន។

ឥណ្ឌូនេស៊ីបានបង្កឲ្យមានភាពចម្រូងចម្រាស កាលពីខែវិច្ឆិកា នៅពេលដែលខ្លួនបានចេញសេចក្តីថ្លែងការណ៍រួមជាមួយប្រទេសចិន ដោយសន្យាថា នឹងអភិវឌ្ឍគម្រោង «នៅក្នុងដែនទឹកត្រួតស៊ីគ្នាដែលប្រទេសទាំង២ បានទាមទារ» ជាអ្វីដែលត្រូវបានបកស្រាយយ៉ាងទូលំទូលាយថា ជាការទទួលស្គាល់ដ៏កម្រ ចំពោះការទាមទារដែនដីដ៏ធំទូលាយរបស់ចិន នៅក្នុងសមុទ្រចិនខាងត្បូង។

ប្រទេសចិនប្រកាសការទាមទារអធិបតេយ្យភាពរបស់ខ្លួន ប្រមាណជា ៩០ភាគរយនៃផ្លូវទឹកនេះ តាមរយៈខ្សែបន្ទាត់ប្រាំបួនរាងអក្សរ U នៅលើផែនទីរបស់ខ្លួន ដែលរួមបញ្ចូលផ្នែកខ្លះនៃតំបន់សេដ្ឋកិច្ចផ្តាច់មុខ (EEZ) របស់ប្រទេសជិតខាង ដែលបានបដិសេធមិនទទួលស្គាល់ការទាមទារនេះ។ សាលាក្តីអន្តរជាតិ ក្នុងឆ្នាំ២០១៦ បានសម្រេចថា ការទាមទារនេះមិនមានមូលដ្ឋានច្បាប់ទេ។ តែប្រទេសចិនបដិសេធមិនទទួលស្គាល់ការសម្រេចនោះ។

ពាក់ព័ន្ធនឹងភាពចម្រូងចម្រាស ក្រោយមានចេញសេចក្ដីថ្លែងការណ៍រួមនោះ លោក Sugiono រដ្ឋមន្ត្រីការបរទេសឥណ្ឌូនេស៊ីដែលមានឈ្មោះតែមួយ ពោលគឺមិនមាននាមត្រកូល នៅថ្ងៃទី២ ខែធ្នូនេះ បានប្រាប់សមាជិកសភាថា ទីក្រុងហ្សាការតា នៅតែមិនទទួលស្គាល់ការទាមទាររបស់ចិនដដែល ហើយនឹងធ្វើការសម្រេចចិត្ត ដោយផ្អែកលើផលប្រយោជន៍ជាតិ។ លោក Sugiono បាននិយាយថា មិនទាន់មានតំបន់ណាមួយ ត្រូវបានបញ្ជាក់ច្បាស់លាស់ ដើម្បីធ្វើការជាមួយចិន ស្ដីពីការរួមគ្នាអភិវឌ្ឍន៍ទាំងផ្នែកនេសាទ ឬទាញយកធនធានផ្សេងទៀតនោះទេ៕