វិមានក្រឹមឡាំង បានឲ្យដឹងនៅថ្ងៃចន្ទនេះថា រាល់ការប៉ុនប៉ងរបស់សហរដ្ឋអាមេរិក ក្នុងការបង្ខំឲ្យប្រទេសនានាប្រើប្រាស់ប្រាក់ដុល្លារ នឹងទទួលបានផលអវិជ្ជមានត្រលប់ទៅវិញ បន្ទាប់ពីប្រធានាធិបតីជាប់ឆ្នោតអាមេរិក លោក Donald Trump បានគំរាមយកពន្ធលើក្រុមប្រទេស BRICS ប្រសិនបើពួកគេបង្កើតរូបិយប័ណ្ណផ្ទាល់ខ្លួន សម្រាប់ប្លុកនេះ។

កាលពីថ្ងៃសៅរ៍ចុងសប្ដាហ៍កន្លងមក លោក Trump បានទាមទារឲ្យបណ្តាប្រទេសជាសមាជិករបស់ BRICS ប្តេជ្ញាថា នឹងមិនបង្កើតរូបិយប័ណ្ណថ្មី ឬគាំទ្ររូបិយប័ណ្ណផ្សេងទៀត ដែលនឹងជំនួសឲ្យប្រាក់ដុល្លារអាមេរិកឡើយ ដោយនិយាយថា បើមិនដូច្នោះទេ ប្រទេសទាំងនោះ នឹងត្រូវប្រឈមជាមួយការយកពន្ធ ១០០ភាគរយ។

ក្រុមប្រទេស BRICS ដំបូងឡើយមានប្រទេសប្រេស៊ីល រុស្ស៊ី ឥណ្ឌា និងចិន ប៉ុន្តែចាប់តាំងពីនោះ បានពង្រីកសមាជិក ដោយទទួលយកប្រទេសផ្សេងទៀត។ ការបង្កើតក្រុមនេះ មិនមានរូបិយប័ណ្ណរួមទេ ប៉ុន្តែការពិភាក្សាយូរអង្វែងលើប្រធានបទនេះ បានទទួលនូវសន្ទុះខ្លះដែរ បន្ទាប់ពីលោកខាងលិចបានដាក់ទណ្ឌកម្មលើរុស្ស៊ី ជុំវិញសង្រ្គាម នៅអ៊ុយក្រែន។

នៅពេលត្រូវបានសួរអំពីការអត្ថាធិប្បាយរបស់លោក Trump អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ប្រាក់ដុល្លារកំពុងបាត់បង់ការទាក់ទាញរបស់ខ្លួន ក្នុងនាមជារូបិយប័ណ្ណបម្រុង សម្រាប់ប្រទេសជាច្រើន ជានិន្នាការដែលលោក បាននិយាយថា កំពុងចាប់ផ្ដើមកើតឡើងក្នុងល្បឿនដ៏លឿន។

លោក Peskov បានប្រាប់អ្នកសារព័ត៌មានថា៖ «ប្រទេសកាន់តែច្រើនកំពុងប្តូរទៅប្រើប្រាស់រូបិយប័ណ្ណជាតិ នៅក្នុងសកម្មភាពពាណិជ្ជកម្ម និងសេដ្ឋកិច្ចបរទេសរបស់ពួកគេ»។ លោកបានព្យាករថា ប្រសិនបើទីក្រុងវ៉ាស៊ីនតោន ងាកទៅប្រើ «កម្លាំងសេដ្ឋកិច្ច» ដើម្បីបង្ខំប្រទេសនានាឲ្យប្រើប្រាស់ប្រាក់ដុល្លារនោះ វានឹងធ្វើឲ្យទទួលបានផលអវិជ្ជមានត្រឡប់ទៅវិញ៕