ប្រធានាធិបតីរបស់ប្រទេសឆាដ លោក Mahamat Deby បាននិយាយថា ការសម្រេចចិត្តបញ្ចប់កិច្ចព្រមព្រៀងយោធារបស់ប្រទេសជាមួយបារាំង ត្រូវបានធ្វើឡើង ព្រោះសុពលភាពបានផុតហើយ ដោយនេះជាលើកឡើងនៅក្នុងសុន្ទរកថាជាសាធារណៈលើកដំបូងរបស់លោក ចាប់តាំងពីការប្រកាសដ៏គួរឲ្យភ្ញាក់ផ្អើល កាលពីសប្តាហ៍មុន។

ក្នុងសុន្ទរកថាមួយដែលបានថ្លែងកាលពីល្ងាចថ្ងៃអាទិត្យ (ទី១ ខែធ្នូ) លោក Deby បានប្រាប់ថា កតិកាសញ្ញានេះលែងស្របនឹងតម្រូវការសន្តិសុខ ឬភូមិសាស្ត្រនយោបាយរបស់ប្រទេសឆាដទៀតហើយ។ ប្រទេសឆាដបានប្រយុទ្ធជាមួយការបះបោររបស់ក្រុមជីហាដអស់រយៈពេលជាង ១ទសវត្សរ៍ ហើយការគាំទ្រដោយកងទ័ពបារាំង និងសហរដ្ឋអាមេរិក មិនបាននាំមកនូវស្ថិរភាពនោះឡើយ។

លោក Deby បានបញ្ជាក់ថា៖ «ការផ្ដាច់នេះ គឺជាផ្នែកនៃឆន្ទៈរបស់យើង ក្នុងការកសាងកងទ័ពឆាដ ដែលមានស្វ័យភាព ការប្តេជ្ញាចិត្ត និងការទទួលខុសត្រូវកាន់តែច្រើនឡើងៗ ក្នុងការការពារមាតុភូមិ»។

គួរបញ្ជាក់ថា រហូតមកដល់ពេលថ្មីៗនេះ លោកខាងលិចបានចាត់ទុកប្រទេសឆាដជាសម្ព័ន្ធមិត្តដ៏សំខាន់ ក្នុងការប្រយុទ្ធប្រឆាំងនឹងក្រុមជីហាដ នៅតំបន់ Sahel។ ក្រុមដែលមានទំនាក់ទំនងជាមួយក្រុម Boko Haram និងរដ្ឋអ៊ិស្លាមមានសកម្មភាព នៅក្នុងតំបន់ Lake Chad របស់ប្រទេសនេះ នៅតាមព្រំដែនភាគនិរតី។

ការសម្រេចរបស់លោក Deby ដើម្បីបញ្ចប់កិច្ចព្រមព្រៀងជាមួយបារាំង អាចបង្ខំឲ្យកងទ័ពបារាំងទាំងអស់ចាកចេញ បន្ទាប់ពីបានឈរជើងនៅទីនោះអស់រយៈពេលជាង ៦ទសវត្សរ៍ ចាប់តាំងពីប្រទេសនេះ ទទួលបានឯករាជ្យ។ ក្នុងឆ្នាំនេះ ឆាដបានបញ្ជាឲ្យកងកម្លាំងតិចតួចរបស់អាមេរិកដែលមានមូលដ្ឋាន នៅទីនោះ ដកចេញ៕