ប្រមុខតុលាការឧក្រិដ្ឋកម្មអន្តរជាតិ (ICC) នៅថ្ងៃចន្ទ (ទី២ ខែធ្នូ) នេះ បាននិយាយថា ការគំរាមកំហែងដែលស្ថាប័ននេះប្រឈមជាមួយ ក្នុងនោះរួមទាំងការដាក់ទណ្ឌកម្មដែលអាចមានរបស់សហរដ្ឋអាមេរិក និងដីការបស់រុស្ស៊ី ដើម្បីចាប់សមាជិកបុគ្គលិកផងដែរ «កំពុងធ្វើឲ្យដំណើរការរបស់ស្ថាប័នស្ថិតក្នុងហានិភ័យ»។

អំឡុងពេលថ្លែងនៅឯសន្និសីទប្រចាំឆ្នាំនៃសមាជិកទាំង ១២៤រូបរបស់តុលាការ លោកស្រីប្រធានចៅក្រម Tomoko Akane មិនបានបញ្ចេញឈ្មោះរុស្ស៊ី ឬសហរដ្ឋអាមេរិកនោះទេ ប៉ុន្តែបានហៅប្រទេសទាំងនោះថា ជាសមាជិកអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិ (UNSC)។

នៅក្នុងសុន្ទរកថារបស់លោក អំឡុងពេលបើកសន្និសីទនេះ លោក Karim Khan រដ្ឋអាជ្ញារបស់ ICC បានលើកឡើងថា៖ «វាគឺច្បាស់លាស់ណាស់ថា ទោះតាមរយៈឧបករណ៍វាស់ស្ទង់ ឬស្តង់ដារណាមួយក៏ដោយ ស្ថាប័ននីតិប្បញ្ញត្តិនេះ គឺស្ថិតនៅក្នុងពេលវេលាដ៏សំខាន់មួយ។ យើងកំពុងជួបប្រទះនឹងបញ្ហាប្រឈមដែលមិនធ្លាប់មានពីមុនមក។ យើងមើលឃើញជនរងគ្រោះសង្គមស៊ីវិល អ្នករស់រានមានជីវិត មនុស្សជាតិទាំងមូល ដូច្នេះ ខ្ញុំគិតថា ការលំបាកមិនធ្លាប់មានពីមុនមក កំពុងនៅពីមុខយើង»។

គួរបញ្ជាក់ថា ប្រទេសរុស្ស៊ីបានចេញដីកាចាប់ខ្លួនប្រមុខរដ្ឋអាជ្ញារបស់ ICC គឺលោក Karim Khan ពីរខែបន្ទាប់ពីតុលាការនៅទីក្រុងឡាអេមួយនេះ បានចេញដីកាចាប់ខ្លួនប្រធានាធិបតីរុស្ស៊ី លោក Vladimir Putin។ ហើយសភាតំណាងរាស្រ្តសហរដ្ឋអាមេរិក កាលពីខែមិថុនា បានអនុម័តច្បាប់មួយ ដើម្បីដាក់ទណ្ឌកម្មដល់តុលាការនេះ ជាការឆ្លើយតបទៅនឹងសំណើរបស់លោក Khan ដើម្បីឲ្យមានដីកាចាប់ខ្លួនលោកនាយករដ្ឋមន្ត្រី Benjamin Netanyahu និងអតីតប្រមុខការពារជាតិរបស់លោក គឺលោក Yoav Gallant៕