ទីភ្នាក់ងារមនុស្សធម៌របស់អង្គការសហប្រជាជាតិបានរាយការណ៍កាលពីថ្ងៃចន្ទសប្ដាហ៍នេះថា ក្នុងរយៈពេលប៉ុន្មានថ្ងៃថ្មីៗនេះ មនុស្សជិត ៥០.០០០នាក់ ត្រូវបានរត់ភៀសខ្លួនក្នុងប្រទេសស៊ីរី ជាទីដែលសម្ព័ន្ធមិត្តសកម្មប្រយុទ្ធដឹកនាំដោយរដ្ឋឥស្លាម បានដណ្តើមកាន់កាប់ទឹកដីជាច្រើនពីការគ្រប់គ្រងរបស់រដ្ឋាភិបាលលោកប្រធានាធិបតី Bashar Assad ។

ទីភ្នាក់ងារមនុស្សធម៌របស់អង្គការសហប្រជាជាតិហៅកាត់ថាអូឆា(OCHA)បាននិយាយកាលពីថ្ងៃចន្ទថា គិតត្រឹមថ្ងៃទី ៣០ ខែវិច្ឆិកា២០២៤នេះ មនុស្សជាង៤៨.៥០០នាក់ត្រូវបានភៀសខ្លួននៅ ក្នុងទីក្រុង អ៊ីដលីប (Idlib) និងភាគខាងជើងទីក្រុងអាឡេប៉ូ (Aleppo) ក្នុងនោះច្រើនជាងពាក់កណ្តាលនៃពួកគេ គឺជាកុមារ។ 

អគ្គលេខាធិការអង្គការសហប្រជាជាតិ លោក Antonio Guterres បាននិយាយកាលពីថ្ងៃចន្ទថា លោកមានការភ្ញាក់ផ្អើលចំពោះការកើនឡើងនៃអំពើហិង្សានៅក្នុងប្រទេសស៊ីរី ហើយបានអំពាវនាវឱ្យបញ្ចប់ការប្រយុទ្ធគ្នាជាបន្ទាន់ ដែលអង្គការរបស់លោកនិយាយថា បានបង្ខំឲ្យមនុស្សជិត ៥ម៉ឺននាក់រត់ចោលផ្ទះសម្បែង ខណៈប្រជាជនស៊ីរី បានឆ្លងកាត់ជម្លោះជិត១៤ឆ្នាំ មកហើយ ។ 

អ្នកនាំពាក្យរបស់លោក Guterres លោក Stephane Dujarric បាននិយាយនៅក្នុងសេចក្តីថ្លែងការណ៍មួយថា ភាគីទាំងអស់ត្រូវតែប្រឹងប្រែងឱ្យអស់ពីសមត្ថភាពដើម្បីការពារជនស៊ីវិល និងគោលដៅស៊ីវិល រួមទាំងការអនុញ្ញាតឱ្យឆ្លងកាត់ដោយសុវត្ថិភាពដល់ជនស៊ីវិលដែលកំពុងភៀសខ្លួនពីជម្លោះនេះ៕