ចំនួនអ្នកស្លាប់ដោយសារទឹកជំនន់ដ៏ធ្ងន់ធ្ងរបំផុតមិនធ្លាប់មានដែលបានវាយប្រហារភាគខាងត្បូងប្រទេសថៃក្នុងរយៈពេលជាច្រើនទសវត្សរ៍មកនេះ បានកើនឡើងដល់ ២២នាក់ ខណៈមនុស្សរាប់ពាន់នាក់នៅតែកំពុងស្នាក់នៅក្នុងជំរំសង្គ្រោះ ហើយក្រុមអាជ្ញាធរបានព្រមានអំពីភ្លៀងធ្លាក់ខ្លាំងបន្ថែមទៀតក្នុងរយៈពេលប៉ុន្មានថ្ងៃខាងមុខនេះ។

យោងតាមនាយកដ្ឋានបង្ការ និងកាត់បន្ថយគ្រោះមហន្តរាយ ខេត្តនានាភាគខាងត្បូងរបស់ប្រទេសថៃ ត្រូវបានវាយប្រហារដោយភ្លៀងធ្លាក់ខ្លាំង និងទឹកជំនន់ដ៏គំហុកចាប់តាំងពីថ្ងៃទី ២២ ខែវិច្ឆិកា។ លំនៅឋានប្រហែល៦៦៤.១៧០ ខ្នង ត្រូវបានរងផលប៉ះពាល់ ។

នាយកដ្ឋានខាងលើនេះបាននិយាយនៅក្នុងសេចក្តីថ្លែងការណ៍មួយថា មនុស្សប្រហែល២២.០០០នាក់ ត្រូវបានជម្លៀសទៅកាន់ទីជម្រកបណ្តោះអាសន្ន ហើយគិតត្រឹមថ្ងៃទី ២ធ្នូសប្ដាហ៍នេះ ខេត្តចំនួន៧នៅតែប្រឈមនឹងទឹកជំនន់នៅឡើយ។ 

មន្ទីរឧតុនិយមបាននិយាយថា ទន្ទឹមនឹងភ្លៀងបានធូរស្រាលក្នុងរយៈពេលពីរបីថ្ងៃកន្លងមកនេះ ភ្លៀងធ្លាក់ខ្លាំងអាចវាយប្រហារតំបន់នេះ ដោយសារតែប្រព័ន្ធសម្ពាធទាបពីសមុទ្រចិនខាងត្បូង ដែលរំពឹងថានឹងបោះពួយកាត់ឈូងសមុទ្រថៃ។    

ប្រភពខាងលើនេះបានបន្ថែមថា ប្រព័ន្ធអាកាសធាតុអាចបណ្តាលឱ្យមានភ្លៀងធ្លាក់ខ្លាំង និងទឹកជំនន់ដ៏គំហុក ចាប់ពីថ្ងៃទី ៣ ដល់ថ្ងៃទី ៥ ខែធ្នូ សប្ដាហ៍នេះ។ 

ចំណែកនៅប្រទេសម៉ាឡេស៊ី និងឥណ្ឌូណេស៊ី វិញ តំបន់ជាច្រើនក៏រងការវាយប្រហារដោយភ្លៀងធ្លាក់ខ្លាំងក្នុងរយៈពេលប៉ុន្មានថ្ងៃថ្មីៗនេះដែរ ដោយរំខានដល់ការងារនៅចម្ការដូងប្រេង និងចម្ការកៅស៊ូ៕