ប្រធានាធិបតីអ៊ីរ៉ង់ លោក ម៉ាស៊ូដ ប៉េស្សេស្គីអាន(Masoud Pezeshkian) បាននិយាយ កាលពីថ្ងៃចន្ទថា អ៊ីរ៉ង់ នឹងធ្វើអ្វីៗគ្រប់យ៉ាងដែលខ្លួនអាចធ្វើបាន«ដើម្បីបង្កើតសន្តិសុខ និងសន្តិភាព» សម្រាប់ បូរណភាពទឹកដីនៃប្រទេសទាំងអស់ ដោយពុំបានបញ្ជាក់ច្បាស់ថា ប្រទេសណាមួយដែលលោកកំពុងនិយាយសំដៅទៅរក។

លោក Pezeshkian បាននិយាយក្នុងបទសម្ភាសន៍ជាមួយទូរទស្សន៍អ៊ីរ៉ង់ក្នុងស្រុកមួយ បន្ទាប់ពីមានសេចក្តីរាយការណ៍ថា លោកបាននិយាយទៅកាន់ប្រធានាធិបតីរុស្ស៊ី លោក វ្ល៉ាឌីមៀ ពូទីន អំពីស្ថានភាពជម្លោះរីកធំនៅក្នុងប្រទេសស៊ីរី ជាកន្លែងដែលរដ្ឋាភិបាលកំពុងប្រយុទ្ធជាមួយក្រុមឧទ្ទាម ដែលបានវាយប្រហារនៅភាគពាយព្យប្រទេសស៊ីរី កាលពីសប្តាហ៍កន្លងទៅនេះ។

សង្គ្រាមស៊ីវិលរបស់ប្រទេសស៊ីរី បានជាប់គាំងចាប់តាំងពីឆ្នាំ២០២០ ដោយប្រធានាធិបតី លោក Bashar al-Assad គ្រប់គ្រងទឹកដីភាគច្រើន និងទីក្រុងធំៗទាំងអស់ ហើយក្រុមឧទ្ទាម នៅតែកាន់កាប់តំបន់ហ៊ុមព័ទ្ធនៅភាគពាយព្យ។

សម្ព័ន្ធក្រុមជីវពលក្នុងតំបន់របស់អ៊ីរ៉ង់ ដោយមានជំនួយពីកម្លាំងវាយប្រហារពីលើអាកាសរបស់រុស្ស៊ី គឺជាចំណុចស្នូលដើម្បីដណ្តើមបានជ័យជម្នះលើកងកម្លាំងគាំទ្ររដ្ឋាភិបាលក្នុងការបង្ក្រាបក្រុមឧទ្ទាមនៅក្នុងប្រទេសស៊ីរី ដែលបានងើបប្រឆាំងប្រធានាធិបតី លោក Bashar al-Assad ក្នុងឆ្នាំ២០១១។

ក្រុមឧទ្ទាម បានសម្រុកចូលទីក្រុងអាឡេបប៉ូ គឺជាជោគជ័យដ៏ធំបំផុតរបស់អ្នកប្រយុទ្ធប្រឆាំង លោក អាសាដ អស់រយៈពេលជាច្រើនឆ្នាំមកនេះ។

កាលពីថ្ងៃច័ន្ទ អ្នកប្រយុទ្ធគាំទ្រដោយអ៊ីរ៉ង់រាប់រយនាក់ បានឆ្លងចូលទៅក្នុងប្រទេសស៊ីរី ដើម្បីជួយរដ្ឋាភិបាលក្នុងការប្រយុទ្ធ។