ប្រធានាធិបតីប្រទេសហ្ស៊កហ្ស៊ី បានអំពាវនាវដល់ប្រទេសលោកខាងលិច កាលពីថ្ងៃចន្ទ ឱ្យគាំទ្រនូវអ្វីដែលលោកស្រីហៅថា «ចលនាជាតិ» ក្នុងការគាំទ្រដល់សមាហរណកម្មរបស់ប្រទេសហ្ស៊កហ្ស៊ីជាមួយសហភាពអឺរ៉ុប។

គណបក្សកាន់អំណាចក្តីសុបិនហ្ស៊កហ្ស៊ី(Georgian Dream Party) បាននិយាយកាលពីសប្តាហ៍មុនថា ខ្លួនកំពុងផ្អាកការចរចាអំពីការចូលជាសមាជិកសហភាពអឺរ៉ុប។

ក្រុមអ្នករិះគន់ បានចាត់ទុកការប្រកាសនេះ ថាជាការបញ្ជាក់ពីការផ្លាស់ប្តូក្រោមឥទ្ធិពលពីរុស្ស៊ី ចេញពីគោលនយោបាយគាំទ្រលោកខាងលិច ហើយងាកទៅរកឥទ្ធិពលរបស់ទីក្រុងមូស្គូ។

យោងតាមលទ្ធផលផ្លូវការបានឲ្យដឹងថា គណបក្សកំពុងកាន់អំណាច ដែលបានទទួលសំឡេងគាំទ្រ ៥៤% កាលពីខែតុលា បានបដិសេធចំពោះការលើកឡើងរបស់ក្រុមអ្នករិះគន់។

លោកស្រី Zourabichvili និងគណបក្សប្រឆាំង បាននិយាយថា ការបោះឆ្នោតគឺជាការក្លែងបន្លំ ជាការចោទប្រកាន់មួយ ដែលត្រូវបានបដិសេធដោយគណបក្សក្តីសុបិនហ្ស៊កហ្ស៊ី និងគណៈកម្មាធិការរៀបចំការបោះឆ្នោត។

សហរដ្ឋអាមេរិក និងសហភាពអឺរ៉ុប បានព្រមានចំពោះអ្វីដែលពួកគេមើលឃើញថាជាការដើរថយក្រោយលទ្ធិប្រជាធិបតេយ្យ របស់ប្រទេសហ្ស៊កហ្ស៊ី។

រដ្ឋាភិបាលនិយាយថា ខ្លួនកំពុងមានចំណាត់ការដើម្បីការពារប្រទេសហ្ស៊កហ្ស៊ីប្រឆាំងការជ្រៀតជ្រែកពីខាងក្រៅ និងការពារប្រទេសនេះពីការអូសទាញដូចជាប្រទេសអ៊ុយក្រែន ឲ្យធ្លាក់ចូលទៅក្នុងសង្រ្គាមជាមួយរុស្ស៊ី។

នាយករដ្ឋមន្ត្រី ហ្ស៊កហ្ស៊ី លោក Irakli Kobakhidze បានចោទប្រកាន់ក្រុមប្រឆាំង «ចំពោះអំហិង្សាដែលត្រូវបានសម្របសម្រួល» ក្នុងគោលបំណងផ្តួលរំលំសណ្តាប់ធ្នាប់រដ្ឋធម្មនុញ្ញ។