នគរបាលក្នុងរដ្ឋធានីប្រទេសហ៊្សកហ្ស៊ី បានប៉ះទង្គិចជាថ្មីម្តងទៀតជាមួយក្រុមបាតុកររាប់ពាន់នាក់ក្នុងយប់ទី៥ នៃការតវ៉ាកាលពីថ្ងៃចន្ទ (០២ ធ្នូ) បន្ទាប់ពីមនុស្សជាង ២០០នាក់ ត្រូវបានឃុំខ្លួនក្នុងអំឡុងពេលបាតុកម្មបួនយប់មុននោះ ប្រឆាំងនឹងការសម្រេចចិត្តរបស់រដ្ឋាភិបាលដែលបានផ្អាកកិច្ចរចរចាចូលរួមជាមួយសហភាពអឺរ៉ុប។

នគរបាលបានប្រើកាណុងបាញ់ទឹក និងឧស្ម័នបង្ហូរទឹកភ្នែក ដើម្បីបណ្ដេញហ្វូងបាតុករចេញពីអគារសភា ជាទីដែលពួកគេប្រមូលផ្តុំគ្នាតវ៉ារាល់យប់ចាប់តាំងពីថ្ងៃព្រហស្បតិ៍សប្ដាហ៍មុនមក នៅពេលគណបក្សកាន់អំណាច ក្ដីសុបិនហ៊្សកហ្ស៊ី (Georgian Dream) បានប្រកាសផ្អាកកិច្ចពិភាក្សាស្តីពីការចូលសមាជិកសហភាពអឺរ៉ុប។

ក្រសួងមហាផ្ទៃហ៊្សកហ្ស៊ី បាននិយាយកាលពីថ្ងៃចន្ទថា អ្នកតវ៉ាចំនួន ២២៤នាក់ត្រូវបានឃុំខ្លួនដោយការចោទប្រកាន់ផ្នែករដ្ឋបាល និង ៣នាក់ត្រូវបានចាប់ខ្លួនពីបទព្រហ្មទណ្ឌ។ រហូតមកដល់ពេលនេះ នគរបាល ១១៣នាក់ រងរបួស ខណៈ ៣នាក់ផ្សេងទៀតកំពុងសម្រាកព្យាបាលនៅមន្ទីរពេទ្យ បន្ទាប់ពីមានការប៉ះទង្គិចគ្នាជាមួយអ្នកតវ៉ា ដែលគប់កាំជ្រួចលើនគរបាល។

គួររម្លឹកថា ជ័យជម្នះដ៏ចម្រូងចម្រាស់របស់បក្ស ក្ដីសុបិនហ៊្សកហ្ស៊ី នៅក្នុងការបោះឆ្នោតសភាកាលពីថ្ងៃទី២៦ ខែតុលា ត្រូវបានគេមើលឃើញយ៉ាងទូលំទូលាយថាជាការបោះឆ្នោតប្រជាមតិលើសេចក្តីប្រាថ្នារបស់ហ៊្សកហ្ស៊ីក្នុងការចូលរួមជាមួយសហភាពអឺរ៉ុប ហើយបានបង្កឱ្យមានបាតុកម្មដ៏ធំ និងការធ្វើពហិការរបស់បក្សប្រឆាំងនៅក្នុងសភា៕