ក្រុមអ្នកសង្កេតការណ៍ បាននិយាយថា ប្រទេសទួរគី អាចជាអ្នកឈ្នះដ៏ធំមួយពីវិបត្តិស៊ីរីថ្មី ដោយផ្តល់ឲ្យខ្លួននូវឱកាស ដើម្បីដោះស្រាយបញ្ហាជនភៀសខ្លួនស៊ីរី និងការគំរាមកំហែងពីជនជាតិភាគតិចឃើដ នៅតាមព្រំដែនរបស់ខ្លួន។

ទោះបីជាប្រធានាធិបតីស៊ីរី លោក បាសា អាសាដ ( Bashar Assad) បានបដិសេធការផ្តល់ជំនួយពី សមភាគីទួរគី លោក រ៉េសិប តាយីប អឺដូហ្កាន់ (Recep Tayyip Erdogan)ក៏ដោយ ទីក្រុងអង់ ការ៉ា ឥឡូវនេះ ហាក់ដូចជាមានតួនាទីសំខាន់កាន់តែខ្លាំងឡើង នៅក្នុងការសម្រេចចិត្ត ដែលនឹងប៉ះពាល់ដល់អនាគតភ្លាមៗរបស់ប្រទេសស៊ីរី។

លោក Omer Ozkizilcik អ្នកស្រាវជ្រាវនៃក្រុមប្រឹក្សាអាត្លង់ទិក នៅទីក្រុងអង់ការ៉ា បាននិយាយថា ទួរគីមាន«ទំនាក់ទំនងដ៏ស្មុកស្មាញ និងលំបាក» ជាមួយអង្គការ Hayat Tahrir Al-Sham (HTS) ដែលជា សម្ព័ន្ធភាពភេរវកម្ម ដែលបានដឹកនាំការវាយលុករបស់ក្រុមសកម្មប្រយុទ្ធ កាលពីសប្តាហ៍មុន។

លោកបានប្រាប់សារព័ត៌មាន AFP ថា៖«យើងអាចនិយាយយ៉ាងច្បាស់ថា មានការគាំទ្រដោយប្រយោលពីទួរគី(សម្រាប់ការវាយលុកនេះ) ប៉ុន្តែមិនមានការពាក់ព័ន្ធពីទួរគីដោយផ្ទាល់ទេ»។

លោកបានបន្ថែមថា ទោះបីជាការវាយប្រហារនេះ ត្រូវបានគ្រោងធ្វើឡើង «កាលពី ៧សប្តាហ៍មុនក៏ដោយ ប្រទេសទួរគី បានបញ្ឈប់ក្រុមសកម្មប្រយុទ្ធពីការបើកការវាយលុកដោយយោធានេះ»។

សម្ព័ន្ធមិត្តរបស់លោក អាសាដ គឺរុស្ស៊ី ក៏បាន«ទម្លាក់គ្រាប់បែកយ៉ាងខ្លាំង» ទៅលើទីតាំងជាច្រើនរបស់ក្រុមសកម្មប្រយុទ្ធ នៅភាគពាយ័ព្យ ដើម្បីរារាំងការវាយប្រហារលើរដ្ឋាភិបាលរបស់លោក។

លោក Charles Lister អ្នកជំនាញនៅវិទ្យាស្ថានមជ្ឈិមបូព៌ារបស់ទីក្រុងវ៉ាស៊ីនតោន បានយល់ស្រប ដោយនិយាយថា «ការវាយលុកនៅទីក្រុងអាឡិបប៉ូ ត្រូវបានគ្រោងទុកដំបូងសម្រាប់ពាក់កណ្តាលខែតុលា ប៉ុន្តែ ប្រទេសទួរគី បានបញ្ឈប់ផែនការនោះ។