កងទ័ពអ៊ីស្រាអែលកាលពីថ្ងៃចន្ទ បានអំពាវនាវឲ្យប្រជាជនជម្លៀសចេញពីតំបន់មួយចំនួននៃភាគខាងត្បូងហ្កាហ្សាស្ទ្រីប ដោយព្រមានថា ក្រុមសកម្មប្រយុទ្ធប៉ាឡេស្ទីន កំពុងបាញ់រ៉ូកែតចេញពីទីនោះ។

នេះគឺជាការអំពាវនាវជាលើកដំបូង ក្នុងរយៈពេលប៉ុន្មានសប្តាហ៍ទាក់ទងនឹងភាគខាងត្បូងនៃទឹកដីប៉ាឡេស្ទីនដែលកំពុងប្រយុទ្ធគ្នា បន្ទាប់ពីយោធាបានបង្វែរការយកចិត្តទុកដាក់របស់ខ្លួន ទៅភាគខាងជើង កាលពីខែតុលា។

អ្នកនាំពាក្យយោធាលោក Avichay Adraee បាននិយាយនៅក្នុងការបង្ហោះជាភាសាអារ៉ាប់ នៅលើ បណ្តាញសង្គម X ដោយថ្លែងទៅកាន់អ្នកស្រុកនៃតំបន់ខាន់យូនីស( Khan Yunis) ថា៖«អង្គការភេរវកម្ម កំពុងបាញ់រ៉ូកែតជាថ្មី ទៅកាន់រដ្ឋអ៊ីស្រាអែលពីតំបន់របស់អ្នកទាំងអស់គ្នា។

លោកបានបន្តថា៖«ដើម្បីសុវត្ថិភាពរបស់អ្នក អ្នកត្រូវតែជម្លៀសចេញតំបន់នោះជាបន្ទាន់ ហើយផ្លាស់ទីទៅតំបន់មនុស្សធម៌» ដោយបានចែករំលែកផែនទីនៃតំបន់ដែលមានបញ្ហា។

កាលពីព្រឹកថ្ងៃចន្ទ យោធាអ៊ីស្រាអែលបាននិយាយនៅក្នុងសេចក្តីថ្លែងការណ៍មួយថា៖«គ្រាប់ផ្លោងមួយគ្រាប់ដែលបានឆ្លងចូលទៅក្នុងទឹកដីអ៊ីស្រាអែលពីតំបន់ខាន់យូនីស ត្រូវបានស្ទាក់ចាប់» ដោយកងកម្លាំងអាកាសអ៊ីស្រាអែល។

ក្រោយមក កងកម្លាំងប្រដាប់អាវុធរបស់ក្រុមហាម៉ាស បានអះអាងទទួលខុសត្រូវ ដោយនិយាយថា ខ្លួនបានបាញ់គ្រាប់រ៉ូកែត ឆ្ពោះទៅភាគខាងត្បូងប្រទេសអ៊ីស្រាអែល។

អ៊ីស្រាអែល បានបំផ្លាញតំបន់ហ្កាហ្សាយ៉ាងច្រើនសន្ធឹកសន្ធាប់ ចាប់តាំងពីខ្លួនបានបើកការវាយលុកយោធាសងសឹក បន្ទាប់ពីការវាយប្រហារ កាលពីថ្ងៃទី ០៧ ខែតុលា ឆ្នាំ ២០២៣ របស់ក្រុមហាម៉ាស។