អ៊ុយក្រែននៅថ្ងៃអង្គារនេះ បានរិះគន់កិច្ចព្រមព្រៀងដែលបានធ្វើឡើងកាលពី៣០ឆ្នាំមុន ក្រោមការដែលខ្លួនបានបោះបង់ចោលអាវុធនុយក្លេអ៊ែរ ជាថ្នូរទៅនឹងការធានាបានសន្តិសុខដែលពុំបានលេចចេញជារូបរាងជាក់ស្តែង ខណៈខ្លួនជំរុញរួមគ្នាសម្រាប់ការអញ្ជើញឱ្យចូលជាសមាជិកសម្ព័ន្ធយោធានេះ។

ទីក្រុងគីវ កំពុងអំពាវនាវយ៉ាងទទូច ឱ្យមានការធានាសន្តិសុខរឹងមាំ ដើម្បីការពារខ្លួនពីការឈ្លានពានរបស់រុស្ស៊ីជាថ្មី ខណៈការវិលត្រឡប់របស់ប្រធានាធិបតីជាប់ឆ្នោតអាមេរិក លោក Donald Trump ទៅកាន់សេតវិមានវិញ បង្កើនការព្រួយបារម្ភនៃដំណោះស្រាយដែលធ្វើឡើងឆាប់រហ័សចំពោះសង្រ្គាម។

ក្រសួងការបរទេសរបស់ប្រទេសអ៊ុយក្រែន បានចង្អុលទៅរកអនុស្សរណៈទីក្រុង Budapest ប្រទេសហុងគ្រី ឆ្នាំ១៩៩៤ ដែលបានមើលឃើញថា ទីក្រុងគីវ បានបោះបង់ចោលឃ្លាំងអាវុធនុយក្លេអ៊ែរធំបំផុតទី៣ របស់ពិភពលោក ជាថ្នូរទៅនឹងការធានាបានសន្តិសុខ រួមទាំងពីប្រទេសរុស្ស៊ីផងដែរ ក្រោយការដួលរលំសហភាពសូវៀតឆ្នាំ១៩៩១។

ក្រសួង បានសរសេរនៅក្នុងសេចក្តីថ្លែងការណ៍មួយ រំលឹកដល់ខួបនៃកិច្ចព្រមព្រៀងថ្ងៃទី ៥ ខែធ្នូ ឆ្នាំ១៩៩៤ ក្នុងសប្តាហ៍នេះថា «ថ្ងៃនេះ អនុស្សរណៈទីក្រុង Budapest គឺជាការរំលឹកដល់ភាពគ្មានចក្ខុវិស័យវែងឆ្ងាយ ក្នុងការសម្រេចចិត្តផ្នែកសន្តិសុខជាយុទ្ធសាស្រ្ត» ។

អ៊ុយក្រែនបានរិះគន់អនុស្សរណៈនេះ តាំងពីឆ្នាំ ២០១៤ មុនការវាយលុកឆ្នាំ ២០២២ នៅពេលដែលទាហានរុស្ស៊ី បានដណ្តើមយកនិងដាក់បញ្ចូលជាឧបសម្ព័ន្ធឧបទ្វីបគ្រីម៉េ របស់អ៊ុយក្រែន។