ផ្ទះ ហាងអាជីវកម្ម និងផ្លូវនានា នៅលើកោះទេសចរណ៍របស់ប្រទេសក្រិក គឺកោះ Rhodes ត្រូវបានគ្របដណ្តប់ដោយភក់ និងកម្ទេចកម្ទី កាលពីថ្ងៃចន្ទ (ទី២ ខែធ្នូ) បន្ទាប់ពីព្យុះ Bora បានបក់បោកលើប្រទេសនេះ កាលពីចុងសប្តាហ៍កន្លងមក។

បើតាមរូបភាពថតតាមយានដ្រូនរបស់សារព័ត៌មាន Reuters បានបង្ហាញថា នៅក្នុងរមណីយដ្ឋាន Faliraki ទឹកជំនន់ដែលបង្កឡើងដោយភ្លៀងធ្លាក់ខ្លាំង បានបំផ្លាញស្ពានមួយកន្លែង បណ្តាលឲ្យដីប្រេះយ៉ាងធំ ហើយបានបង្កការខូចខាតដល់ផ្ទះសម្បែង និងហាងលក់ទំនិញជាច្រើន នៅលើឆ្នេរនេះ។ នៅក្នុងភូមិ Tsairi ស្ពានមួយកន្លែងក៏បានបាក់ផងដែរ ដោយបានកាត់ផ្តាច់អ្នកស្រុកចេញពីផ្លូវសំខាន់ៗ។

អ្នកស្រុកឈ្មោះ Flora Drapanou អាយុ ៣១ឆ្នាំ បាននិយាយថា៖ «ស្ពាននេះត្រូវបានដាច់ជា២ ហើយមិនមានផ្លូវផ្សេងទៀតដែលអាចចូលទៅបានដោយងាយស្រួលឡើយ ទោះដោយរថយន្ត ឬដោយថ្មើរជើង ដើម្បីបានទៅដល់ផ្លូវធំ និងទៅកន្លែងណាក៏ដោយ»។

កងពន្លត់អគ្គិភ័យបានដាក់ពង្រាយអង្គភាពពីលើអាកាស ដោយបានបញ្ជូនអ្នកពន្លត់អគ្គិភ័យចំនួន ៣៥នាក់ពីទីក្រុងអាថែន ជាមួយនឹងឧបករណ៍បូមទឹក និងទូកជួយសង្គ្រោះចំនួន ២គ្រឿង។ លើសពីនេះទៀត អ្នកពន្លត់អគ្គិភ័យចំនួន ៤០នាក់ ដែលមានរថយន្ត ១០គ្រឿង ពីទីក្រុង Piraeus បានមកទៅដល់ទីនោះ តាមសមុទ្រ ដើម្បីគាំទ្រដល់កិច្ចខិតខំប្រឹងប្រែងជួយសង្គ្រោះ។ កោះ Rhodes និង Limnos បានប្រកាសស្ថានភាពក្នុងគ្រាអាសន្ន៕