ប្រធានាធិបតីអ៊ីរ៉ង់ លោក Masoud Pezeshkian បាននិយាយថា លោកនឹងជួបជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន ក្នុងពេលឆាប់ៗនេះ ដើម្បីពិភាក្សាអំពីវិធីដោះស្រាយវិបត្តិស៊ីរី។

សារព័ត៌មានរបស់ប្រធានាធិបតីអ៊ីរ៉ង់ បានដកស្រង់សម្តីលោកPezeshkian ដែលបាននិយាយថា៖«ខ្ញុំនឹងរៀបចំកិច្ចប្រជុំជាមួយប្រធានាធិបតីរុស្ស៊ីស្តីពីស្ថានភាព នៅក្នុងប្រទេសស៊ីរី នាពេលខាងមុខនេះ»។ លោកបានបន្ថែមថា ទីក្រុងតេអេរ៉ង់ និងទីក្រុងមូស្គូ នឹងប្រឹងប្រែងឲ្យអស់ពីសមត្ថភាព ដើម្បីសម្រួលដល់កិច្ចខិតខំប្រឹងប្រែង ដើម្បីធ្វើឲ្យស្ថានការណ៍នៅស៊ីរី មានស្ថិរភាព។

លោក Pezeshkian បានធ្វើការសន្ទនាតាមទូរស័ព្ទជាមួយលោក ពូទីន កាលពីថ្ងៃទី ០២ ខែធ្នូថា ការកើនឡើងនៃសកម្មភាពភេរវករ នាពេលបច្ចុប្បន្ន នៅក្នុងប្រទេសស៊ីរី គឺជាផ្នែកនៃផែនការដ៏គ្រោះថ្នាក់ ដែលត្រូវបានបង្កើតឡើងដោយអ៊ីស្រាអែលនិងសហរដ្ឋអាមេរិក ដើម្បីបង្កើតអស្ថិរភាព នៅមជ្ឈិមបូព៌ា។ លោក ប្រធានាធិបតីអ៊ីរ៉ង់ បានវាយតម្លៃខ្ពស់ចំពោះតួនាទីរបស់រុស្ស៊ី ក្នុងការរក្សាសន្តិភាពក្នុងតំបន់ និងបូរណភាពទឹកដីរបស់ប្រទេសស៊ីរី។