ប្រព័ន្ធផ្សព្វផ្សាយក្នុងស្រុកបានរាយការណ៍ថា មនុស្សយ៉ាងហោចណាស់១០នាក់ រួមមានជនជាតិអេក្វាឌ័រ និងកូឡុំប៊ី ត្រូវបានសម្លាប់ក្នុងការវាយប្រហារប្រដាប់អាវុធ នៅក្រុង El Guabo ជាក្រុងក្នុងខេត្តឆ្នេរសមុទ្រ El Oro ភាគខាងត្បូងប្រទេសអេក្វាឌ័រ។

សាក្សី បាននិយាយថា ក្រុមជនប្រដាប់អាវុធ បានបាញ់ប្រហារដោយមិនរើសមុខទៅលើមនុស្សជាច្រើននាក់ ដែលកំពុងដេកក្នុងផ្ទះជួលមួយកន្លែង។

 យោងតាមនគរបាលក្នុងតំបន់បានឲ្យដឹងថា ការស៊ើបអង្កេតបឋមបង្ហាញថា ការវាយប្រហារនេះអាចជាប់ពាក់ព័ន្ធទៅនឹងជម្លោះរវាងក្រុមឧក្រិដ្ឋជនរៀបចំទុក។ ឧបទ្ទវហេតុនេះ ត្រូវបានគេរាយការណ៍នៅ ម៉ោងប្រហែល៥ព្រឹក ម៉ោងក្នុងស្រុក បន្ទាប់ពីអ្នកស្រុកបានឮស្នូរកាំភ្លើង និងបានឃើញសាកសពច្រើននាក់ នៅតាមដងផ្លូវ។

ខេត្ត El Oro បានស្ថិតក្នុងស្ថានភាពគ្រាអាសន្ន ចាប់តាំងពីថ្ងៃទី៣ ខែតុលា បន្ទាប់ពីការកើនឡើងយ៉ាងខ្លាំងនៃអំពើហិង្សា និងអសន្តិសុខ។ វិធានការនេះ បានកំណត់រយៈពេល៦០ថ្ងៃ អនុវត្តនៅតំបន់ចំនួន៧ផ្សេងគ្នានៅក្នុងប្រទេស រួមទាំងរដ្ឋធានីគីតូ ផងដែរ ដែលតំបន់ទាំងនេះកំពុងប្រឈមទៅនឹងឧក្រិដ្ឋកម្មកើនឡើង។

ចាប់តាំងពីដើមឆ្នាំមក ប្រទេសអេក្វាឌ័រ បានមើលឃើញការកើនឡើងអំពើហិង្សា រួមមានទាំងការធ្វើអត្តឃាត ការចាប់ជំរិត និងការជំរិតទារប្រាក់។