ប្រធានាធិបតីសហរដ្ឋអាមេរិកលោក Joe Biden បានចុះចតនៅប្រទេសអង់ហ្គោឡាកាលពីថ្ងៃចន្ទ សម្រាប់ដំណើរទស្សនកិច្ចផ្តោតសំខាន់លើគម្រោងផ្លូវរថភ្លើងគាំទ្រដោយសហរដ្ឋអាមេរិក និងកេរ្តិ៍ដំណែលទាសភាព ប៉ុន្តែការសម្រេចចិត្តរបស់លោកក្នុងការលើកលែងទោសឲ្យកូនប្រុស Hunter Biden របស់លោក បានគំរាមគ្របដណ្តប់របៀបវារៈផ្លូវការ ។

ដំណើរទស្សនកិច្ចនេះ ធ្វើតាមការសន្យាបំពេញទស្សនកិច្ចទៅកាន់អនុតំបន់សាហារ៉ាអាហ្វ្រិក អំឡុងតំណែងប្រធានាធិបតីរបស់លោក និងមានគោលដៅពង្រឹងគម្រោងច្រករបៀង Lobito ដែលតភ្ជាប់សាធារណរដ្ឋប្រជាធិបតេយ្យកុងហ្គោសម្បូរធនធាន និងសំប៊ី ទៅកាន់កំពង់ផែ Lobito របស់អង់ហ្គោឡា ស្ថិតក្នុងមហាសមុទ្រអាត្លង់ទិក ។

ផ្តល់មូលនិធិមួយផ្នែកដោយប្រាក់កម្ចីសហរដ្ឋអាមេរិក គម្រោងច្រករបៀង Lobito នឹងធ្វើឲ្យការនាំចេញធនធានរ៉ែសំខាន់ៗកាន់តែលឿន និងកាន់តែងាយស្រួលជាងមុន ទៅកាន់សហរដ្ឋអាមេរិក ដែលត្រូវបានគេមើលឃើញថា ជាផ្លូវបង្វែរធនធានមួយចំនួនចេញពីចិន ។

លោក John Kirby គឺជាអ្នកនាំពាក្យសន្តិសុខជាតិរបស់លោក Biden និយាយថា លោក Biden នឹងបង្ហាញការប្តេជ្ញាចិត្តបន្ថែមទៀតចំពោះគម្រោងមួយនេះ អំឡុងដំណើរទស្សនកិច្ចរបស់លោក ក៏ដូចជាកម្មវិធីសុខភាព អាកាសធាតុ និងថាមពលស្អាត ។

ស្របពេលដែលដំណើរទស្សនកិច្ចរបស់លោក Biden កើតឡើងនៅថ្ងៃចុងក្រោយនៃតំណែងប្រធានាធិបតីរបស់លោក លោក Donald Trump ទំនងជាគាំទ្រគម្រោងផ្លូវរថភ្លើង ហើយនិងនៅបន្តជាដៃគូជិតស្និតជាមួយអង់ហ្គោឡា ពេលដែលលោកវិលត្រឡប់មកកាន់សេតវិមានវិញនាខែមករាខាងមុខនេះ ៕