លោក Hadi al-Bahra គឺជាមេដឹកនាំក្រុមប្រឆាំងស៊ីរីនៅក្រៅប្រទេស និយាយប្រាប់ទីភ្នាក់ងារព័ត៌មានរ៉យទ័រកាលពីថ្ងៃចន្ទថា ក្រុមយុទ្ធជនឧទ្ទាមស៊ីរី បានចាប់ផ្តើមត្រៀមខ្លួនរឹបអូសទីក្រុង Aleppo កាលពីរយៈពេល ១ឆ្នាំមុន ប៉ុន្តែប្រតិបត្តិការនេះ ត្រូវបានពន្យាពេលដោយសារសង្រ្គាមនៅតំបន់ហ្គាហ្សា និងចុងក្រោយពួកគេបានបើកការវាយប្រហារកាលពីសប្តាហ៍មុន ពេលដែលបទឈប់បាញ់កើតមានក្នុងប្រទេសលីបង់ ។

លោក Hadi និយាយនៅក្នុងបទសម្ភាសន៍ថា ក្រុមបះបោរ អាចរឹបអូសបានទីក្រុង និងផ្នែកខ្លះនៅខេត្ត Idlib បានយ៉ាងឆាប់រហ័សបែបនេះ ដោយសារតែក្រុមហេសបូឡា និងក្រុមសកម្មប្រយុទ្ធគាំទ្រដោយអ៊ីរ៉ង់ផ្សេងទៀត ត្រូវបានរំខានដោយសារជម្លោះរបស់ពួកគេជាមួយអ៊ីស្រាអែល ។

លោកបន្តថា យោធាទួរគី ដែលមានសម្ព័ន្ធភាពជាមួយក្រុមបះបោរមួយចំនួន និងមានមូលដ្ឋាននៅទូទាំងតំបន់ព្រំដែនភាគខាងត្បូងក្នុងប្រទេសស៊ីរី បានដឹងពីផែនការរបស់ក្រុមប្រដាប់អាវុធ ប៉ុន្តែច្បាស់ណាស់ថា ពួកគេគ្មានការរួមចំណែកដោយផ្ទាល់នោះទេ ។

ការវាយប្រហារតំបន់ភាគពាយ័ព្យស៊ីរី ត្រូវបានធ្វើឡើងកាលពីថ្ងៃពុធសប្តាហ៍មុន នៅថ្ងៃដែលអ៊ីស្រាអែល និងក្រុមហេសបូឡា បានចាប់ផ្តើមបទឈប់បាញ់ បញ្ចប់ការប្រយុទ្ធគ្នារយៈពេលជាង ១ឆ្នាំរបស់ពួកគេ ។

លោក Bahra ដែលជាប្រធានកងកម្លាំងចម្រុះជាតិនៃបដិវត្តន៍ស៊ីរី និងជាក្រុមប្រឆាំងស៊ីរីទទួលស្គាល់ដោយអន្តរជាតិ បាននិយាយថា រយៈពេល ១ឆ្នាំមុន ពួកគេចាប់ផ្តើមលុតដុំខ្លួន និងកេណ្ឌកម្លាំង ហើយនិងគិតគូរបានយ៉ាងហ្មត់ចត់ ។

លោកនិយាយនៅការិយាល័យរបស់លោកស្ថិតក្នុងទីក្រុងអ៊ីស្តានប៊ុល ប្រទេសទួរគីថា ប៉ុន្តែសង្រ្គាមនៅហ្កាហ្សា បន្ទាប់មកសង្រ្គាមនៅលីបង់ បានពន្យាពេលផែនការរបស់ពួកគេ ។ ពួកគេយល់ឃើញថា វាមិនសូវល្អនោះទេ កាលដែលមានសង្រ្គាមនៅលីបង់ហើយ បែរជាមានសង្រ្គាមនៅស៊ីរីទៀត ក្នុងពេលតែមួយ ។

ប្រតិបត្តិការរបស់ក្រុមឧទ្ទាមនេះដែរ បានក្លាយជាការងារប្រឈមដ៏ធំបំផុតសម្រាប់ប្រធានាធិបតីស៊ីរីលោក Bashar al-Assad ចាប់តាំងពីឆ្នាំ ២០២០មក ៕