ប្រព័ន្ធផ្សព្វផ្សាយរដ្ឋ បានរាយការណ៍ថា តុលាការ នៅប្រទេសវៀតណាម នាថ្ងៃអង្គារ (ទី៣ ខែធ្នូ) នេះ បានតម្កល់សាលក្រមកាត់ទោសប្រហារជីវិត ចំពោះមហាសេដ្ឋិនីអចលនទ្រព្យ គឺលោកស្រី Truong My Lan បន្ទាប់ពីបានច្រានចោលការប្ដឹងឧទ្ធរណ៍របស់លោកស្រី ប្រឆាំងនឹងការកាត់ទោសពីបទគៃបន្លំ និងការសូកប៉ាន់ ក្នុងសំណុំរឿងលួចបន្លំដ៏ល្បីល្បាញមួយដែលមានទំហំទឹកប្រាក់ចំនួន ១២ពាន់លានដុល្លារ។

គួររំលឹកថា លោកស្រី Lan ដែលជាប្រធានក្រុមហ៊ុនអភិវឌ្ឍន៍អចលនទ្រព្យ Van Thinh Phat Holdings Group ត្រូវបានកាត់ទោសប្រហារជីវិត កាលពីខែមេសា ពាក់ព័ន្ធនឹងការទទួលខុសត្រូវរបស់លោកស្រី នៅក្នុងអ្វីដែលជាករណីក្លែងបន្លំហិរញ្ញវត្ថុដ៏ធំបំផុតរបស់ប្រទេសវៀតណាម ក្នុងប្រវត្តិសាស្ត្រ។

សារព័ត៌មានអនឡាញ VnExpress បានរាយការណ៍ថា តុលាការប្រជាជនជាន់ខ្ពស់ នៅភាគខាងត្បូងទីក្រុងហូជីមិញ បានសម្រេចថា មិនមានមូលដ្ឋាន ក្នុងការកាត់បន្ថយទោសប្រហារជីវិតរបស់លោកស្រី Lan នោះឡើយ។ សេចក្ដីរាយការណ៍ បានឲ្យដឹងទៀតថា ប្រសិនបើលោកស្រី Lan អាចប្រគល់ត្រលប់មកវិញនូវចំនួន ១ភាគ៤ នៃប្រាក់ដែលត្រូវបានលួចបន្លំ ក្នុងអំឡុងពេលរង់ចាំអនុវត្តទោសប្រហារជីវិត នោះវាអាចទៅរួច ដែលការកាត់ទោស អាចនឹងត្រូវបានបន្ថយមកត្រឹមជាប់ពន្ធនាគារអស់មួយជីវិត។

គួរបញ្ជាក់ថា លោកស្រី Lan គឺជាម្នាក់ ក្នុងចំណោមនាយកប្រតិបត្តិធុរកិច្ចដ៏ល្បីល្បាញបំផុតជាច្រើនរូប និងជាមន្ត្រីរដ្ឋដែលត្រូវបានចាប់ដាក់ពន្ធនាគារ នៅក្នុងយុទ្ធនាការប្រឆាំងអំពើពុករលួយអូសបន្លាយពេលយ៉ាងយូរររបស់ប្រទេសកុម្មុយនីស្តមួយនេះ ដែលគេស្គាល់ថា យុទ្ធនាការ «Blazing Furnace» (ឡដុតកម្ដៅ)៕