​អាស៊ាន៖ បណ្ដា​មេដឹកនាំ​អាស៊ាន​បាន​ចាប់ផ្ដើម​ជំនួប​កំពូល​ប្រចាំ​ឆ្នាំ​របស់​ខ្លួន​នៅ​ថ្ងៃ​អង្គារ​នេះ ដោយ​គ្មាន​វត្តមាន​មេដឹកនាំ​យោធា​សហ​ភាព​​មី​យ៉ាន់​ម៉ា​លោក Min Aung Hlaing ដែល​បាន​ផ្ដួល​រំលំ​រដ្ឋាភិបាល​ស៊ីវិល​កាលពី​ថ្ងៃ​ទី​១ ខែ​កុម្ភៈ ក្នុង​ការ​បដិសេធន៍​ដ៏​កម្រ​សម្រាប់​ក្រុម​ប្រទេស​ជា​សមាជិក​ក្នុង​តំបន់ ដែល​ជា​ធម្មតា​ត្រូវ​គេ​ដឹង​ថាគ្មាន​ការ​ជ្រៀតជ្រែក​កិច្ចការ​ប្រទេស​ណាមួយ​ឡើយ​។

​លោក​ប្រធានាធិបតី​អាមេរិក Joe Biden នឹង​ចូលរួម​ជំនួប​នេះ​តាម video ជា​លើកដំបូង​ក្នុង​រយៈពេល​ ៤​ឆ្នាំ​បន្ទាប់ពី​អតីត​ប្រធានាធិបតី Donald Trump ពុំ​ចូលរួម​ក្រោយ​ឆ្នាំ២០១៧​។ ប៉ុន្តែ​ទំនងជា​នឹង​ពុំ​មាន​អ្នក​តំណាង​ឲ្យ​សហភាព​មី​យ៉ាន់ម៉ា​នៅ​ជំនួប​កំពូល​អាស៊ាន​ដែល​មាន​សមាជិក​ ១០​ប្រទេស​នោះ​ទេ​។ ប្រទេស​ប្រ៊ុយណេ​ដែល​ធ្វើជា​ម្ចាស់ផ្ទះ​ជំនួប​កំពូល​នេះ​បាន​និយាយ​ថា ប្លុក​នេះ​នឹង​អញ្ជើញ​អ្នក​តំណាង​មិន​ពាក់ព័ន្ធ​នឹង​កិច្ចការ​នយោបាយ​ពី​សហភាព​មី​យ៉ាន់​ម៉ា​ឲ្យ​ចូលរួម ប៉ុន្តែ​ពុំបាន​បញ្ជាក់​ថា អ្នក​ណា​នឹង​មក​ចូលរួម​តំណាង​នោះ​ទេ។​ រដ្ឋមន្ត្រីការបរទេស​របស់​សហភាព​មី​យ៉ាន់​ម៉ា​បាន​និយាយ​កាលពី​ល្ងាច​ថ្ងៃ​ចន្ទ​ថា ខ្លួន​នឹង​អនុញ្ញាត​ឲ្យ​តែ​ប្រមុខរដ្ឋ ឬ​អ្នកតំណាង​ថ្នាក់​រដ្ឋមន្ត្រី​ប៉ុណ្ណោះ ដោយ​ចង្អុល​បង្ហាញ​ថា កៅអី​របស់​ខ្លួន​នឹង​ទុក​ឲ្យ​ទំនេរ​នៅ​ជំនួប​កំពូល​នោះ៕

អត្ថបទ៖ សុខមាន