ក្រុមស្ម័គ្រចិត្ត និងក្រុមកាយរិទ្ធហេសបូឡា បានជួបជុំគ្នានៅតំបន់ជាយក្រុងភាគខាងត្បូងទីក្រុងបេរូត ប្រទេសលីបង់ ដើម្បីបោសសម្អាតកម្ទេចកម្អីតាមដងផ្លូវ ។

ក្រុមស័្មគ្រចិត្តក្មេងៗ បានប្រើប្រាស់អំបោស និងដៃទទេរ ដើម្បីបោសសម្អាតកម្ទេចកម្ទី ក្រោយការវាយប្រហាររបស់អ៊ីស្រាអែល បណ្តាលឲ្យមានការខូចខាតធ្ងន់ធ្ងរដល់អគារ និងហាង នៅតំបន់នោះ អំឡុងជម្លោះរវាងក្រុមហេសបូឡា និងទាហានអ៊ីស្រាអែល ។

លោក Sarah Shukr គឺជាអ្នកស្ម័គ្រចិត្តមួយរូប និយាយថា ពួកយើងនឹងបន្តការងាររបស់ពួកយើង រហូតដល់អ្នករាល់គ្នាវិលត្រឡប់មកវិញ ហើយពួកយើងនឹងបោសសម្អាតអំបែងកែវ និងកម្ទេចកម្ទី ឲ្យបានច្រើនតាមដែលពួកយើងអាចធ្វើទៅបាន គ្មានឱសានវាទច្បាស់លាស់នោះទេ ពួកយើងនឹងបន្តយុទ្ធនាការមួយនេះ និងមានរយៈពេលយូរតាមបំណងរបស់ព្រះ ។

ក្រុមហេសបូឡា បាននិយាយថា ពួកគេបានបើកការវាយប្រហារព្រមានការពារខ្លួន លើទីតាំងឈរជើងរបស់យោធាអ៊ីស្រាអែល នៅតំបន់ជម្លោះ Shebaa Farms កាលពីថ្ងៃចន្ទ ដោយពួកគេលើកឡើងពីអ្វីដែលពួកគេចាត់ទុកថាជាការបំពានម្តងហើយម្តងទៀតលើបទឈប់បាញ់ រួមទាំងការវាយប្រហារតាមច្រកអាកាស និងការផ្លោងគ្រាប់កាំភ្លើងធំ ។

យោធាអ៊ីស្រាអែល និយាយថា ការវាយប្រហាររបស់ក្រុមហេសបូឡា មានមីស៊ីល ២គ្រាប់ និងពុំបណ្តាលឲ្យមានគ្រោះថ្នាក់នោះទេ ។

នៅមុននេះ ទីភ្នាក់ងារព័ត៌មានជាតិ NNA គ្រប់គ្រងដោយលីបង់ រាយការណ៍ថា កងកម្លាំងអ៊ីស្រាអែល បានផ្លោងគ្រាប់កាំភ្លើងធំ ២គ្រាប់លើទីក្រុងភាគខាងត្បូង Beit Lif របស់លីបង់ ។ ពុំមានសេចក្តីរាយការណ៍ពីគ្រោះថ្នាក់នោះទេ នៅក្នុងឧបទ្ទេវហេតុមួយនេះ ៕