បំណាក់ដីបង្កឡើងដោយសារភ្លៀងធ្លាក់ក្រោយការបោកបក់របស់ព្យុះស៊ីក្លូន Fengal បណ្តាលឲ្យមានការខូចខាតច្រើននៅស្រុក Tiruvannamalai រដ្ឋ Tamil Nadu ប្រទេសឥណ្ឌា ខណៈពេលអ្នកភូមិវាយតម្លៃការបាត់បង់របស់ពួកគេនាថ្ងៃអង្គារនេះ ។

ទឹកជំនន់បានជន់លិចផ្ទះសម្បែងប្រជាពលរដ្ឋ ពេលដែលក្រុមជួយសង្រ្គោះ ដើរលុកតំបន់រងផលប៉ះពាល់ដោយសារបំណាក់ដីដែលបានសម្លាប់មនុស្សយ៉ាងហោច ៧នាក់ ។

អ្នកស្រី Unnamalai គឺជាអ្នកភូមិមួយរូបរស់នៅក្នុងស្រុក Tiruvannamalai និយាយថា អ្នកស្រីកំពុងដេកពេលដែលទឹកជំនន់ហូរកាត់ផ្ទះរបស់គាត់ ហើយមានមនុស្សម្នាក់ បានទាញគាត់ចេញពីផ្ទះ និងបានសង្រ្គោះអាយុជីវិតរបស់គាត់ ។

ព្យុះស៊ីក្លូន បានបោកបក់ឆ្លងកាត់ទំបន់ឆ្នេរភាគខាងត្បូង ចេញពីឆកសមុទ្របឹងហ្គាល់ និងនាំមកជាមួយសន្ទុះខ្យល់បក់ខ្លាំង និងភ្លៀងធ្លាក់ខ្លាំងនៅទូទាំងតំបន់កាលពីថ្ងៃសៅរ៍ ។

ផ្លូវ និងតំបន់រស់នៅរបស់អ្នកស្រុក បានរងការជន់លិចគ្មានសេសសល់ ហើយកងកម្លាំងសន្តិសុខ បានប្រើប្រាស់ទូក ដើម្បីសង្រ្គោះមនុស្ស ។

ដោយឡែក ទិន្នន័យចុងក្រោយពីមន្ទីរគ្រប់គ្រងគ្រោះមហន្តរាយនៅទីក្រុង Colombo បង្ហាញថា ក្នុងប្រទេសស្រីលង្កា មនុស្ស ១៦នាក់ ត្រូវបានសម្លាប់ ហើយភ្លៀងធ្លាក់ខ្លាំងធ្វើឲ្យប៉ះពាល់ដល់មនុស្សសរុប ១៣៨.៩៤៤គ្រួសារ ៕