នៅថ្ងៃអង្គារនេះ ក្រុមរដ្ឋមន្រ្តីការបរទេសអង្គការណាតូជួបគ្នានៅទីក្រុងព្រុចសែល ប្រទេសបែលហ្ស៊ិក ដើម្បីពិភាក្សាលើសមាជិកភាពរបស់អ៊ុយក្រែនជាមួយសម្ព័ន្ធមិត្តយោធាមួយនេះ និងវិបត្តិនៅតំបន់មជ្ឈិមបូព៌ា ។

 ទោះបីជាយ៉ាងណាក៏ដោយ យោងតាមការអះអាងរបស់ក្រុមមន្រ្តីការទូត បានឲ្យដឹងថា ណាតូទំនងជាពុំចាប់អារម្មណ៍នឹងការអំពាវនាវរបស់អ៊ុយក្រែននោះឡើយ សម្រាប់ការបញ្ជើញឲ្យក្លាយជាសមាជិកភាព នៅក្នុងជំនួបនៅថ្ងៃអង្គារនេះ ធ្វើឲ្យបាត់បង់ក្តីសង្ឃឹមរបស់ទីក្រុងគីវ ក្នុងការពង្រឹងនយោបាយ ស្របពេលដែលពួកគេកំពុងធ្វើសង្រ្គាមជាមួយរុស្ស៊ី និងរង់ចាំការវិលត្រឡប់មកកាន់សេតវិមានវិញរបស់លោក Donald Trump ។

 នៅក្នុងលិខិតមួយច្បាប់ផ្ញើរជូនសមភាគីណាតូមុនជំនួប រដ្ឋមន្រ្តីក្រសួងការបរទេសអ៊ុយក្រែនលោក Andrii Sybiha និយាយថា ការអញ្ជើញនឹងត្រូវដកចេញការជំទាស់មួយក្នុងចំណោមការជំទាស់សំខាន់ៗរបស់រុស្ស៊ី ក្នុងការធ្វើសង្រ្គាមរបស់ពួកគេ គឺការការពារអ៊ុយក្រែនពីការចូលរួមជាមួយសម្ព័ន្ធមិត្តមួយនេះ ។

 ក្រុមមន្រ្តីការទូតដែលសុំមិនបញ្ចេញឈ្មោះ និយាយថា ប៉ុន្តែគ្មានសញ្ញានោះទេនៃការឯកភាពត្រូវការនៅក្នុងចំណោម សមាជិករបស់ណាតូទាំង ៣២ សម្រាប់ការសម្រេចចិត្តបែបនេះ នៅក្នុងជំនួបរដ្ឋមន្រ្តីការបរទេសក្នុងទីក្រុងព្រុចសែល ។

 អ៊ុយក្រែនយល់ឃើញថា សមាជិកភាពណាតូ គឺជាការធានាដ៏ល្អបំផុតមួយចំពោះសន្តិសុខនាពេលអនាគតរបស់ពួកគេ ។

 សូមបញ្ជាក់ថា ក្រោមមាត្រា ៥នៃកិច្ចព្រមព្រៀងការពារគ្នាទៅវិញទៅមករបស់ណាតូ សមាជិកឯកភាពថា ការវាយប្រហារលើសមាជិកមួយ ប្រៀបបាននឹងការវាយប្រហារលើសមាជិកទាំងអស់ ហើយពួកគេនឹងជួយគ្នាទៅវិញទៅមក ៕