អាជ្ញាធរសង្ស័យថា អាចជាការប៉ុនប៉ងស្នាក់នៅក្នុងប្រទេសកូរ៉េខាងត្បូង ដោយខុសច្បាប់ បន្ទាប់ពីអ្នកទេសចរវៀតណាមចំនួន ៣៨នាក់ ត្រូវបានរាយការណ៍ថា បានបាត់ខ្លួន នៅក្នុងកោះរមណីយដ្ឋាន Jeju។

ទីភ្នាក់ងារសារព័ត៌មាន Yonhap បានរាយការណ៍ថា អ្នកទេសចរដែលបាត់ខ្លួននោះ គឺជាផ្នែកនៃក្រុមអ្នកទេសចរប្រហែល ៩០នាក់ ដែលបានទៅដល់កោះ Jeju កាលពីថ្ងៃទី១៤ ខែវិច្ឆិកា។ ពួកគេបានធ្វើដំណើរចេញពីទីក្រុង Nha Trang តាមយន្តហោះរបស់ក្រុមហ៊ុនអាកាសចរណ៍ Vietjet Air។

អ្នកទេសចរទាំង ៣៨នាក់នោះ បានបាត់ខ្លួនក្នុងអំឡុងពេលឈប់សំចតចុងក្រោយនៃការធ្វើដំណើររបស់ពួកគេ ហើយមិនបានឡើងយន្តហោះដែលបានគ្រោងទុក កាលពីថ្ងៃទី១៧ ខែវិច្ឆិកា ដើម្បីត្រឡប់វៀតណាមវិញឡើយ។

គួរបញ្ជាក់ថា នៅក្រោមកម្មវិធីលើកលែងទិដ្ឋាការ អ្នកទេសចរមកពី ៦៤ប្រទេស ក្នុងនោះរួមទាំងវៀតណាមផងដែរ អាចស្នាក់នៅលើកោះនេះបានរយៈពេលរហូតដល់ទៅ ៣០ថ្ងៃ ដោយគ្មានទិដ្ឋាការ។ ប៉ុន្តែពួកគេមិនអាចធ្វើដំណើរទៅកាន់តំបន់ផ្សេងទៀតរបស់កូរ៉េខាងត្បូងបានឡើយ ដូចជាទីក្រុងសេអ៊ូល ឬទីក្រុងប៊ូសានជាដើម ប្រសិនបើពួកគេមិនមានទិដ្ឋាការស្របច្បាប់ សម្រាប់ដីគោកទេនោះ។

សារព័ត៌មាន Yonhap បានរាយការណ៍ថា ការិយាល័យអន្តោប្រវេសន៍របស់កោះ Jeju កំពុងស្វែងរកក្រុមអ្នកទេសចរដែលបាត់ខ្លួននេះ៕