ទិន្នន័យផ្លូវការ នៅថ្ងៃអង្គារ (ទី៣ ខែធ្នូ) នេះ បានបង្ហាញថា ប្រទេសអេស្ប៉ាញបានកត់ត្រានូវខែវិច្ឆិកាដែលក្តៅបំផុតមិនធ្លាប់មាន គិតចាប់តាំងពីការចាប់ផ្ដើមរក្សាកំណត់ត្រា កាលពីជាង ៦ទសវត្សរ៍មុន បើទោះបីជាខែតុលាបានបញ្ចប់ទៅដោយការមានទឹកជំនន់ដ៏អាក្រក់បំផុតក៏ដោយ។

ទីភ្នាក់ងារអាកាសធាតុជាតិ AEMET បានឲ្យដឹងនៅលើបណ្ដាញសង្គមថា សីតុណ្ហភាពជាមធ្យម ក្នុងខែវិច្ឆិកា គឺ ១២,៤អង្សាសេ ដែលមានកម្រិត ០,៥អង្សាសេខ្ពស់ជាងកំណត់ត្រាពីមុន សម្រាប់ខែនេះ ក្នុងឆ្នាំ១៩៨៣ និង ២,៨អង្សាសេ ខ្ពស់ជាងមធ្យមភាគខែវិច្ឆិកា ចន្លោះឆ្នាំ២៩៩១ និងឆ្នាំ២០២០។

នេះជាសីតុណ្ហភាពជាមធ្យមខ្ពស់បំផុត ក្នុងរយៈពេលមួយខែនៃខែវិច្ឆិកា គិតចាប់តាំងពីទីភ្នាក់ងារនេះ បានចាប់ផ្តើមរក្សាកំណត់ត្រា ក្នុងឆ្នាំ១៩៦១។ ទីភ្នាក់ងារនេះបានឲ្យដឹងថា «នេះក៏ជាខែវិច្ឆិកាដែលហួរហែងខ្លាំងផងដែរ» ដោយបន្ថែមថា ទឹកភ្លៀង គឺ ៤០ភាគរយនៅក្រោមកម្រិតធម្មតា «ទោះបីជាមានភ្លៀងធ្លាក់ច្រើន» ក្នុងអំឡុងប៉ុន្មានថ្ងៃដំបូងនៃខែ នៅសមុទ្រមេឌីទែរ៉ាណេក៏ដោយ។

គួររំលឹកថា ភ្លៀងធ្លាក់ខ្លាំង កាលពីថ្ងៃទី២៩ ខែតុលា បានបណ្តាលឲ្យមានទឹកជំនន់យ៉ាងគំហុកភ្លាមៗ ដែលបានសម្លាប់មនុស្សយ៉ាងហោចណាស់ ២៣០នាក់ ហើយបានហូរនាំយករថយន្ត និងបង្កការខូចខាតយ៉ាងធ្ងន់ធ្ងរដល់ផ្ទះសម្បែង និងអាជីវកម្មនានា ជាពិសេសតំបន់ភាគខាងកើតនៃទីក្រុង Valencia នៅលើឆ្នេរមេឌីទែរ៉ាណេ៕