ដោយប្រឈមការខ្វះខាតស្បៀងអាហារដ៏ធ្ងន់ធ្ងរបន្ទាប់ពីសង្រ្គាមជិត ១៤ ខែ ពលរដ្ឋប៉ាឡេស្ទីន បានរៀបរាប់ពីទុក្ខលំបាកក្នុងការទទួលបានម្សៅមី និងនំប៉័ង នៅតំបន់ហ្កាហ្សាស្ទ្រីប ដែលបំផ្លិចបំផ្លាញដោយជម្លោះរវាងអ៊ីស្រាអែល និងក្រុមហាម៉ាស។

ជារៀងរាល់ព្រឹក មនុស្សសម្រុកទៅប្រមូលផ្ដុំគ្នានៅខាងក្រៅហាងនំប៉័ងពីរ-បី កន្លែង ដែលអាចបើកក្នុងទឹកដីប៉ាឡេស្ទីន ខណៈមនុស្សព្យាយាមប្រជ្រៀតយកកញ្ចប់នំប៉័ងនៅកន្លែងចែកចាយអាចអាហារ។

ចាប់តាំងពីការផ្ទុះសង្រ្គាមនៅហ្កាហ្សាកាលពីឆ្នាំមុន អង្គការសប្បុរសធម៌ និងអង្គការជំនួយអន្តរជាតិបានព្រមានដដែលៗអំពីកម្រិតវិបត្តិនៃភាពអត់ឃ្លានសម្រាប់មនុស្សជិតពីរលាននាក់។

ការវាយតម្លៃដែលគាំទ្រដោយអង្គការសហប្រជាជាតិកាលពីខែមុនបានព្រមានអំពីគ្រោះទុរ្ភិក្សដែលកំពុងកើតមាននៅដែនដីហែកហួរដោយសង្រ្គាមហ្កាហ្សាភាគខាងជើង ស្របពេលមានការផ្អាកជំនួយស្បៀងអាហារបន្ទាប់ពីអ៊ីស្រាអែលបានបើកការវាយលុកនៅក្នុងតំបន់នោះ។

អង្គការសហប្រជាជាតិរាយការណ៍ថាស្ទើរតែទាំងអស់នៃប្រជាជន២,៣លាននាក់នៅហ្កាហ្សាឥឡូវនេះត្រូវបានរត់ភៀសខ្លួនចេញពីទីលំនៅ មនុស្ស៩នាក់ក្នុងចំណោម១០នាក់កំពុងរស់ក្នុងជំរំតង់។

ប្រជាជនប៉ាឡេស្ទីនមកពីទូទាំងតំបន់ហ្កាហ្សាស្ទ្រីបបានប្រាប់អ្នកសារព័ត៌មានថាពិតជាលំបាកខ្លាំងណាស់ទម្រាំរកបានម្សៅមួយកញ្ចប់ទម្ងន់៥០គីឡូក្រាម ដែលអាចផ្គត់ផ្គង់ជីវភាពបានរយៈពេលជាច្រើនសប្តាហ៍មុនពេលមានសង្រ្គាម។

នៅក្នុងតំបន់ហ្កាហ្សាជាទីដែលអគារជាងពាក់កណ្តាលត្រូវបានបំផ្លាញ ផលិតកម្មកំពុងជាប់គាំងស្ទើរតែទាំងស្រុង។ រោងម៉ាស៊ីនកិនម្សៅ ឃ្លាំងស្តុកម្សៅ និងហាងនំប៉័ង មិនអាចដំណើរការបានទេ ព្រោះរងការខូចខាតយ៉ាងខ្លាំងដោយសារការវាយប្រហារឥតឈប់សម្លាប់មនុស្សរាល់ថ្ងៃពីអ៊ីស្រាអែល៕