សមាជិកសភាកូរ៉េខាងត្បូង នៅថ្ងៃពុធ (០៤ ធ្នូ) នេះ បានអំពាវនាវឱ្យមានការចោទប្រកាន់ទម្លាក់តំណែងលោកប្រធានាធិបតី Yoon Suk Yeol បន្ទាប់ពីលោកបានប្រកាសច្បាប់អាជ្ញាសឹក ប៉ុន្តែត្រូវបានលុបចោលប៉ុន្មានម៉ោងក្រោយមក ដែលបង្កឱ្យមានវិបត្តិនយោបាយដ៏ធំបំផុតក្នុងពេលជាច្រើនទសវត្សរ៍នៅក្នុងសេដ្ឋកិច្ចធំបំផុតទីបួនរបស់អាស៊ី។

សេចក្តីប្រកាសដ៏គួរឱ្យភ្ញាក់ផ្អើលកាលពីល្ងាចថ្ងៃអង្គារនោះ បានបញ្ឆេះការប្រឈមមុខដាក់គ្នាដ៏តានតឹងជាមួយសភា ដែលបានច្រានចោលការប៉ុនប៉ងរបស់លោកក្នុងការហាមឃាត់សកម្មភាពនយោបាយ និងត្រួតពិនិត្យប្រព័ន្ធផ្សព្វផ្សាយ ខណៈសមាជិកសភាប៉ះទង្គិចជាមួយកងទ័ពដែលបម្រុងចូលខាងក្នុងសភា។

ក្រុមសមាជិកសភាមកពីបក្សប្រឆាំងបាននិយាយថា ពួកគេគ្រោងនឹងស្នើច្បាប់មួយដើម្បីចោទប្រកាន់ទម្លាក់តំណែងលោក Yoon នៅថ្ងៃពុធនេះ ដែលនឹងត្រូវបោះឆ្នោតក្នុងពេល ៧២ម៉ោង។ លោក Hwang Un-ha សមាជិកសភាម្នាក់ក្នុងក្រុមចម្រុះ បានប្រាប់អ្នកយកព័ត៌មានថា "សភាគួរតែផ្តោតលើការផ្អាកតួនាទីរបស់ប្រធានាធិបតីភ្លាមៗ ដើម្បីអនុម័តសំណើច្បាប់ទម្លាក់តំណែងនោះឱ្យបានឆាប់បំផុត"។

សូមបញ្ជាក់ថា រដ្ឋសភាអាចចោទប្រកាន់ទម្លាក់តំណែងប្រធានាធិបតីបាន ប្រសិនបើសមាជិកសភាច្រើនជាងពីរភាគបីបោះឆ្នោតគាំទ្រ។ បន្ទាប់មក ការកាត់ក្តីមួយនឹងត្រូវធ្វើឡើងដោយតុលាការធម្មនុញ្ញ ដែលអាចបញ្ជាក់សំណើនោះដោយការបោះឆ្នោតពីចៅក្រម ៦រូបក្នុងចំណោម ៩រូប។ គណបក្សរបស់លោក Yoon គ្រប់គ្រងអាសនៈចំនួន ១០៨ ប៉ុណ្ណោះនៅក្នុងសភាដែលមានសមាជិក ៣០០អាសនៈ៕