ជំហានដ៏ប្រថុយប្រថានរបស់ប្រធានាធិបតីកូរ៉េខាងត្បូង លោក Yoon Suk Yeol ក្នុងការដាក់ច្បាប់អាជ្ញាសឹក ដែលបានលុបចោលវិញប៉ុន្មានម៉ោងក្រោយនោះ បានចោទជាសំណួរភ្លាមៗពីអនាគតនយោបាយរបស់មេដឹកនាំដែលមិនសូវមានប្រជាប្រិយភាពខ្លាំងរូបនេះ។

លោក Yoon បានប្រឈមការអំពាវនាវឱ្យចុះពីតំណែងដោយអ្នកនយោបាយប្រឆាំង ហើយលោកក៏អាចត្រូវចោទប្រកាន់ទម្លាក់តំណែងដោយសភាផងដែរ ប្រសិនបើលោកមិនធ្វើដូច្នេះ។ អាណត្តិរបស់លោក Yoon មានរហូតដល់ឆ្នាំ២០២៧ ប៉ុន្តែបើលោកចេញពីតំណែងមុនកំណត់ នោះនឹងនាំឱ្យមានការបោះឆ្នោតដើម្បីសម្រេចអ្នកស្នងតំណែងបន្ទាប់។

មានបេក្ខជននយោបាយឈានមុខគេ ៣រូបដែលគេមើលឃើញថាអាចជំនួសលោក Yoon ប្រសិនបើលោកត្រូវគេបង្ខំឱ្យដើរចេញ ឬជ្រើសរើសលាឈប់ដោយខ្លួនឯង។

អ្នកទីមួយគឺលោក លី ជេម្យ៉ុង (Lee Jae-myung) មេដឹកនាំបក្សប្រជាធិបតេយ្យប្រឆាំងដ៏សំខាន់វ័យ ៦០ឆ្នាំ ដែលបានចាញ់លោក Yoon យ៉ាងស្ដួចស្ដើងក្នុងការបោះឆ្នោតប្រធានាធិបតីឆ្នាំ២០២២ ខណៈជ័យជម្នះបក្សនេះក្នុងការបោះឆ្នោតសភាខែមេសា បានផ្តល់ឱ្យលោក Lee នូវកម្លាំងរុញច្រានដ៏ខ្លាំងក្លាសម្រាប់តំណែងប្រធានាធិបតី ប៉ុន្តែលោកក៏ប្រឈមនឹងហានិភ័យនៃការដកខ្លួនចេញពីជីវិតនយោបាយផងដែរ បន្ទាប់ពីតុលាការបានកាត់ទោសពីបទរំលោភច្បាប់បោះឆ្នោតកាលពីខែវិច្ឆិកា។

អ្នកទីពីរគឺមេដឹកនាំបក្សអំណាចប្រជាជន ដែលកំពុងកាន់អំណាចរបស់លោក Yoon ផ្ទាល់ គឺលោក ហាន ដុងហ៊ូន (Han Dong-hoon) ជាមួយនឹងការស្ទង់មតិបង្ហាញថា លោក Han នឹងក្លាយជាជម្រើសដ៏ពេញនិយមបំផុតមួយដើម្បីជំនួសលោក Yoon ក្នុងការបោះឆ្នោតប្រធានាធិបតី ដែលគ្រោងទុកនៅឆ្នាំ២០២៧។

អ្នកចុងក្រោយគឺលោក ឆូ គុក (Cho Kuk) ដែលជាគូប្រជែងរបស់លោក Yoon អាចនឹងក្លាយជាបេក្ខភាពដ៏ក្ដៅគគុកក្នុងការជំនួសតំណែងប្រធានាធិបតីបច្ចុប្បន្នរូបនេះ។ លោក Cho ដឹកនាំគណបក្សកសាងកូរ៉េឡើងវិញ RKP ដែលមានទំនោរឆ្វេងនិយមបន្តិច និងធ្លាប់ជាមន្រ្តីជាន់ខ្ពស់ក្នុងអំឡុងរដ្ឋបាលរបស់លោកអតីតប្រធានាធិបតី មូន ជេអ៊ីន (Moon Jae-in)៕