កោះកុង៖ សមាជិកក្រុមគ្រួសារសពអ្នកដែលស្លាប់ដោយសារជំងឺកូវីដ-១៩ នៅក្នុងក្រុងខេមរភូមិន្ទ ខេត្តកោះកុង ចំនួន ០៨គ្រួសារ ទទួលថវិកាឧបត្ថម្ភពីរាជរដ្ឋាភិបាលកម្ពុជា សម្រាប់ដោះស្រាយជីវភាពរស់នៅប្រចាំថ្ងៃ។
រាជរដ្ឋាភិបាលកម្ពុជា តាមរយៈអាជ្ញាធរខេត្ត ក្រុងខេរមភូមិន្ទ បន្តចុះសួរសុខទុក្ខ និងផ្តល់ថវិកាឧបត្ថម្ភដល់សមាជិកគ្រួសារសពពលរដ្ឋស្លាប់ដោយសារជំងឺកូវីដ ក្រោយពួកគាត់បាត់បង់មនុស្សជាទីស្រឡាញ់អំឡុងរីករាលជំងឺដ៏កាចសាហាវនេះ។
លោក សៀង កក្កដា អភិបាលរងក្រុងខេមរភូមិន្ទ ឱ្យដឹងនៅរសៀលថ្ងៃទី២៦ ខែតុលា ឆ្នាំ២០២១ថា ការផ្តល់ថវិការបស់រដ្ឋាភិបាលកម្ពុជានៅពេលនេះ គឺជាការយកចិត្តទុកដាក់ខ្ពស់បំផុតពីសម្តេចតេជោ នាយករដ្ឋមន្ត្រី ដោយមិនប្រកាន់និន្នាការនយោបាយ មានឬក្រនោះទេ។
ដោយក្នុង ១គ្រួសារ ទទួលបានថវិកាចំនួន ២លានរៀល ទន្ទឹមនោះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី ក៏ឧបត្ថម្ភដល់សមាជិកគ្រួសារអ្នកស្លាប់ដោយកូវីដ ១គ្រួសារ ទទួលបាន ៥០ម៉ឺនរៀលបន្ថែមទៀតដែរ។
បញ្ហាជំងឺកូវីដ សុទ្ធតែត្រូវបានផ្សព្វផ្សាយណែនាំ ផ្តល់ថ្នាំវ៉ាក់សាំងដល់ពលរដ្ឋគ្រប់គ្នា ជាពិសេសមានការផ្ទុះជំងឺនៅតាមមូលដ្ឋានភូមិសង្កាត់ លោកជំទាវ មិថុនា ភូថង អភិបាលខេត្តកោះកុង និងលោក ឈេង សុវណ្ណដា អភិបាលក្រុងខេរមភូមិន្ទ រិះរកដំណោះស្រាយទប់ស្កាត់គ្រប់វិធានការទាំងអស់។
បើតាមលោក សៀង កក្កដា រយៈពេល៤ខែ ចាប់ពីថ្ងៃទី១២ ខែមិថុនា ដល់ថ្ងៃទី៣ ខែកញ្ញា ឆ្នាំ២០២១មូលដ្ឋានក្រុងខេមរភូមិន្ទ មានពលរដ្ឋស្លាប់ដោយសារជំងឺកូវីដចំនួន ៨នាក់ ក្នុងនោះ មានសង្កាត់ស្ទឹងវែង សង្កាត់ដងទង់ សង្កាត់ស្មាច់មានជ័យ។ ទាំងរាជរដ្ឋាភិបាល រដ្ឋបាលខេត្តកោះកុង និងអាជ្ញាធរក្រុងខេមរភូមិន្ទ មិនអនុញ្ញាតឱ្យពលរដ្ឋណាម្នាក់ស្លាប់ឥតស្បៀងអាហារសោះឡើយ។
អាជ្ញាធរក្រុងខេមរភូមិន្ទ និងសង្កាត់ភូមិ ស្នើដល់ពលរដ្ឋទាំងអស់បន្តចូលរួមវិធានការសុខាភិបាល ក្នុងន័យប្រឆាំងជំងឺកូវីដជាមួយអាជ្ញាធរ ព្រមទាំងរាជរដ្ឋាភិបាល ទោះបីជាបានចាក់វ៉ាក់សាំងហើយក៏ដោយ។
ម្យ៉ាងទៀត មេត្តាទៅពិនិត្យបញ្ជីឈ្មោះបោះឆ្នោតនៅតាមសង្កាត់នីមួយៗ ចំពោះរាល់ពេលមានទុក្ខលំបាកក្នុងជីវភាពរស់នៅ ប្រញាប់ផ្តល់ព័ត៌មានមកកាន់អាជ្ញាធរភូមិសង្កាត់ឱ្យបានទាន់ពេលវេលា ដើម្បីដោះស្រាយជូនពលរដ្ឋ។
របាយការណ៍របស់រដ្ឋបាលខេត្តកោះកុង ឱ្យដឹងថា ឈ្មោះអ្នកស្លាប់ដោយសារជំងឺកូវីដ-១៩ ដែលត្រូវឧបត្ថម្ភជូនគ្រួសារសព ដូចជា៖ ទី១.ឈ្មោះ ស៊ឹម ស្រីល័ក្ខ ភូមិស្ទឹងវែង សង្កាត់ស្ទឹងវែង ទី២. ឈ្មោះ ផុក វុន ភូមិ១ សង្កាត់ដងទង់ ទី៣.ឈ្មោះ សោម ញឹម ភូមិ៣ សង្កាត់ស្មាច់មាន័យ ទី៤.ឈ្មោះ ម៉ៃ សារ៉ស់ ភូមិ៤ សង្កាត់ដងទង់ ទី៥.ឈ្មោះ ជ គង់ ភូមិ១ សង្កាត់ដងទង់ ទី៦. ឈ្មោះ សំ ឃន ភូមិ២ សង្កាត់ដងទង់ ទី៧ ចាន់ ភារៈ ភូមិស្ទឹងវែង សង្កាត់ស្ទឹងវែង និងទី៨. ឈ្មោះ សំ អឿន ភូមិ១ សង្កាត់ដងទង់៕ អត្តបទ៖ ឈឹម មករា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
