ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានបន្តលើកទឹកចិត្ត ជំរុញ​ឱ្យគ្រូឧទ្ទេស ចូលរួមអនុវត្តន៍អនុសាសន៍របស់ប្រមុខរាជរដ្ឋាភិបាលឱ្យបានជោគជ័យ លើការ​បណ្តុះ​បណ្តាលជំនាញបច្ចេកទេសដល់សិក្ខាកាមឲ្យមានភាពល្អប្រសើរ និងគុណភាព ដោយ​ផ្អែក​លើ​ពាក្យ​ស្លោក "រៀនឱ្យចប់ រៀនឱ្យចេះ និងមានការងារធ្វើ"។

នៅក្នុងបិទវគ្គវិក្រឹតការគ្រូបច្ចេកទេសស្តីពី វិធីសាស្ត្របង្រៀន និងការប្រើប្រាស់ម៉ូឌុលតាមជំនាញ លើក​ទី២ ដើម្បីគាំទ្រដល់កម្មវិធីបណ្តុះបណ្តាលជំនាញវិជ្ជាជីវៈ និងបច្ចេក​ទេស​កម្រិត​សញ្ញាបត្រ​បច្ចេក​ទេស និង​វិជ្ជាជីវៈ ១ សម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យ នៅ​ព្រឹក​ថ្ងៃ​ទី៤ ខែធ្នូនេះ ឯកឧត្តមរដ្ឋមន្រ្តី បានមានប្រសាសន៍ថា ការបណ្តុះ​បណ្តាល​នានា​ជោគ​ជ័យ​បា​នតាមការណែនាំរបស់ប្រមុខរាជរដ្ឋាភិបាល គឺអា​ស្រ័យ​ទាំង​ស្រុង​ទៅ​លើ​គ្រូឧ​ទ្ទេស​ទាំង​អស់​ដែល​ត្រូវ​បំពញភារកិច្ចរបស់ខ្លួនតាមអ្វីដែលក្រសួង និងសាលាបានដាក់​ជូនដោយ​ក្នុង​នោះ​គ្រូ​ឧទ្ទេស ចាំបាច់ត្រូវពង្រឹងសមត្ថភាពរបស់ខ្លួនជាប្រចាំ ដើម្បីធានា​ពី​ប្រសិទ្ធភាព​នៃ​ការ​ផ្ទេរ​ចំណេះ​ដឹង​ ក្នុងរយៈពេលដ៏ខ្លីនេះដែលទាមទារឱ្យមានមេរៀនប្រកបដោយភាពទាក់ទាញ ងាយ​ស្រួល​យល់ ឆាប់ចេះ និងមានការ​ចុះអនុវត្ត​ផ្ទាល់​ក្នុង​រោង​ជាង​ឱ្យ​បាន​ច្បាស់លាស់​ក្នុង​គោល​បំណង​ធានា​ពី​ប្រសិទ្ធភាពនៃការបណ្តុះបណ្តាលដែលគ្រប់ភាគីពាក់ព័ន្ធទទួលស្គាល់ជាពិសេសវិស័យឯកជន។

លោក ថៃ ឆេងម៉ៅ គ្រូបច្ចេកទេសផ្នែកការកែច្នៃបន្លែ និងផ្លែឈើ មកពីវិទ្យាស្ថាន​ពហុបច្ចេក​ទេស​ខេត្ត​កំពង់ស្ពឺ និងលោកស្រី សាន គីមជេន ជាគ្រូបច្ចេកទេសផ្នែកការកែច្នៃបន្លែ និងផ្លែឈើ មក​ពី​វិទ្យាស្ថាន​ពហុបច្ចេកទេសខេត្តកំពង់ធំ បានប្តេជ្ញាថា នឹងប្រឹងប្រែង​ឲ្យ​អស់​លទ្ធភាព​ក្នុង​ការ​ចែក​រំលែក​ចំណេះ​ដឹង និងជំនាញ ដល់សិស្សគ្រប់ជំនាន់ ដើម្បីជំរុញវិស័យអប់រំ​បណ្តុះ​បណ្តាល​បច្ចេក​ទេស និងវិជ្ជាជីវៈ ឲ្យកាន់តែរីកចម្រើន និងល្អប្រសើរឡើងបន្ថែមទៀតនៅក្នុងសង្គមជាតិ។

វគ្គបណ្តុះបណ្តាលជំនាញវិក្រឹតការគ្រូបច្ចេកទេសលើកទី២នេះ មានគ្រូឧទ្ទេស គ្រូឧទេ្ទសជំនួយ និង​គ្រូ​សិក្ខាកាមចំនួនជាង ២៥០នាក់ ដែលបានបញ្ចប់​ដោ​យ​ជោគ​ជ័យដែ​លទ​ទួល​បាន​ការ​បណ្តុះ​បណ្តាល​ពីថ្ងៃទី២៥ ខែវិច្ឆិកា ដល់ថ្ងៃទី៤ ខែធ្នូ ឆ្នាំ២០២៤។ សូមបញ្ជាក់ជូនថា ការ​បណ្តុះ​បណ្តាលគ្រូវិក្រឹត្យការនេះ គឺធ្វើឡើងដើម្បីគាំទ្រដល់កម្មវិធីបណ្តុះបណ្តាលជំនាញវិជ្ជាជីវៈ និង​បច្ចេក​ទេស​កម្រិតសញ្ញាបត្របច្ចេកទេស និងវិជ្ជាជីវៈ ១ ដល់យុវជនមកពីគ្រួសារក្រីក្រ និងគ្រួសារ​ងាររ​ង​ហានិភ័យ​ដែល​រាជ​រដ្ឋាភិបាល​កម្ពុជា​បាន​ដាក់​ចេញ​ក្នុង​គោល​បំណង​ផ្តល់​ជំនាញ​ជាក់​លាក់​រយៈពេលខ្លី និងមានការងារធ្វើឆាប់រហ័ស ដើម្បី​ជួយ​សម្រួល​ដល់ជី​វភាព​គ្រួសារ​ដែល​កំពុង​ស្ថិត​ក្នុងស្ថានភាពលំបាក៕