ក្រុមឧទ្ទាមជនជាតិភាគតិចដ៏សំខាន់ទី២ នៅសហភាពមីយ៉ាន់ម៉ា បាននិយាយថា ខ្លួនបានត្រៀមខ្លួនរួចជាស្រេច សម្រាប់កិច្ចចរចាសម្របសម្រួលដោយប្រទេសចិនជាមួយរបបយោធា ដើម្បីបញ្ចប់ការប្រយុទ្ធថ្មីរយៈពេលជាង ១ឆ្នាំ ដែលបានបំផ្លិចបំផ្លាញតំបន់ នៅតាមព្រំដែនចិន។

កងទ័ពសម្ព័ន្ធប្រជាធិបតេយ្យជាតិមីយ៉ាន់ម៉ា (MNDAA) ដែលមានយុទ្ធជនប្រហែល ៨.០០០នាក់ បានប្រយុទ្ធជាមួយយោធាមីយ៉ាន់ម៉ាអស់រយៈពេលជាងមួយទសវត្សរ៍មកហើយ ដើម្បីទទួលបានស្វ័យភាព សម្រាប់ជនជាតិភាគតិច Kokang នៅភាគខាងជើងរដ្ឋ Shan។

កាលពីឆ្នាំមុន ក្រុមនេះ និងក្រុមឧទ្ទាមសម្ព័ន្ធមិត្តចំនួន ២ផ្សេងទៀត បានបើកការវាយលុកប្រឆាំងនឹងយោធា និងបានដណ្តើមកាន់កាប់តំបន់ជាច្រើន នៅរដ្ឋ Shan ក្នុងនោះរួមទាំងអណ្តូងរ៉ែ Ruby និងផ្លូវហាយវេ ដែលជាផ្លូវពាណិជ្ជកម្មដ៏កាក់កបទៅកាន់ប្រទេសចិន។

យោធាបានវាយលុកដែនដីដែលខ្លួនបានបាត់បង់ម្តងហើយម្តងទៀត ដោយប្រើប្រាស់កាំភ្លើងធំ និងការវាយប្រហារតាមអាកាស ប៉ុន្តែការវាយបកដែលបានសន្យា តាមផ្លូវគោក មិនទាន់ប្រើនៅឡើយទេ។ កាលពីសប្តាហ៍មុន ក្រុម MNDAA ដែលជាសម្ព័ន្ធមិត្តនៃកងទ័ពរំដោះជាតិ Ta'ang (TNLA) បាននិយាយថា ខ្លួនបានត្រៀមខ្លួនរួចជាស្រេច សម្រាប់កិច្ចពិភាក្សាជាមួយរបបយោធា។

ហើយនៅក្នុងសេចក្តីថ្លែងការណ៍មួយដែលបានចេញផ្សាយកាលពីល្ងាចថ្ងៃអង្គារ (ទី៣ ខែធ្នូ) MNDAA បានប្រាប់ថា៖ «ចាប់ពីថ្ងៃនេះតទៅ យើងនឹងបញ្ឈប់ការបាញ់ប្រហារភ្លាមៗ ហើយនឹងមិនវាយប្រហារយ៉ាងសកម្មលើកងទ័ពមីយ៉ាន់ម៉ាទៀតទេ»៕