ក្រុមទាំងពីរ បាននិយាយថា ការប្រយុទ្ធគ្នារវាងកងទ័ពកុងហ្គោ និងក្រុមឧទ្ទាម M23 បានចាប់ផ្តើមជាថ្មី នៅភាគខាងកើតប្រទេសកុងហ្គោ ជាការរំលោភបំពានបទឈប់បាញ់មួយផ្សេងទៀត នៅមុនកិច្ចពិភាក្សាការសម្រុះសម្រួលដ៏មានសក្តានុពល។ 

កងទ័ពបាននិយាយនៅក្នុងសេចក្តីថ្លែងការណ៍មួយថា ខ្លួនបានធ្វើឲ្យមានការខាតបង់យ៉ាងធ្ងន់ធ្ងរលើក្រុម ឧទ្ទាម នៅក្នុងទីប្រជុំជន Lubero នៃខេត្ត North Kivu កាលពីថ្ងៃចន្ទ ដោយក្នុងនោះមានមនុស្សស្លាប់ និងរបួសជាច្រើននាក់។ អ្នកនាំពាក្យក្រុមឧទ្ទាម M23 បានលើកឡើងនៅលើប្រព័ន្ធផ្សព្វផ្សាយសង្គម Xថា ក្រុមនេះ ត្រូវបានវាយប្រហារដោយកងទ័ព កាលពីព្រឹកថ្ងៃអង្គារ ផងដែរ។

M23 គឺជាក្រុមប្រដាប់អាវុធមួយក្នុងចំណោមក្រុមប្រដាប់អាវុធចំនួន ១០០ក្រុម ដែលបានកំពុងប្រឹងប្រែងដណ្តើមយកទីតាំងមួយ នៅភាគខាងកើតប្រទេសកុងហ្គោ ដែលសម្បូរទៅដោយសារធាតុរ៉ែ នៅជិតព្រំដែនជាមួយប្រទេសរ៉្វាន់ដា នៅក្នុងជម្លោះដែលបានបង្កើតវិបត្តិមនុស្សធម៌ដ៏ធំបំផុតមួយរបស់ពិភពលោក។ មនុស្សជាង ៧លាននាក់ ត្រូវបានជម្លៀស។

ប្រទេសកុងហ្គោ និងអង្គការសហប្រជាជាតិ ចោទប្រកាន់ប្រទេសរ៉្វាន់ដាថា បានគាំទ្រក្រុមឧទ្ទាមM23។ ប្រទេសរ៉្វាន់ដា បានបដិសេធការអះអាងនេះ ប៉ុន្តែកាលពីខែកុម្ភៈ បានសារភាពថា ខ្លួនមានកងទ័ព និងប្រព័ន្ធមីស៊ីលនៅភាគខាងកើតកុងហ្គោ ដើម្បីការពារសន្តិសុខរបស់ខ្លួន ដោយចង្អុលទៅការកសាងកងកម្លាំងកុងហ្គោ នៅជិតព្រំដែន។ អ្នកជំនាញអង្គការសហប្រជាជាតិ ប៉ាន់ស្មានថា មានកងកម្លាំងរ្វ៉ាន់ដា រហូតដល់ ៤.០០០នាក់ នៅកុងហ្គោ។