គ្រួសារលីបង់ដែលបានផ្លាស់ទីលំនៅទៅប្រទេសអ៊ីរ៉ាក់ដោយជម្លោះរវាងអ៊ីស្រាអែល និងក្រុមហេសបូឡា បានចាប់ផ្តើមត្រឡប់ទៅស្រុកកំណើតរបស់ពួកគេវិញ នៅភាគខាងត្បូងប្រទេសលីបង់ បន្ទាប់ពីមានបទឈប់បាញ់ដែលបានព្រមព្រៀងគ្នា នាពេលថ្មីៗនេះ។

ការបញ្ឈប់អរិភាពនេះ បានអនុញ្ញាតឲ្យមនុស្សជាច្រើនត្រឡប់មកវិញ ទោះបីជាមានការបំផ្លិចបំផ្លាញយ៉ាងទូលំទូលាយក៏ដោយ។

ដោយរង់ចាំជាមួយមនុស្សរាប់សិបនាក់ផ្សេងទៀតនៅអាកាសយានដ្ឋាន Najaf នៅក្នុងប្រទេសអ៊ីរ៉ាក់ ដើម្បីឡើងជិះយន្តហោះត្រឡប់ទៅទីក្រុងបេរូតជាមួយគ្រួសាររបស់គាត់វិញ លោក អាលី អាប់ឌុលឡា ជាអ្នករស់នៅលីបង់ភាគខាងត្បូង បាននិយាយថា៖«ក្រោយពីពីរខែ យើងត្រឡប់ទៅស្រុកកំណើតវិញ។ យើងនឹងត្រឡប់មកវិញ បើទោះជាយើងរកឃើញផ្ទះរបស់យើង ត្រូវបានបំផ្លាញក៏ដោយ។  

យោងតាមតួលេខផ្លូវការ បានឲ្យដឹងថា ប្រជាជនលីបង់ជាង ២០.000នាក់ បានស្វែងរកការជ្រកកោននៅក្នុងប្រទេសអ៊ីរ៉ាក់ ចាប់តាំងពីការផ្ទុះឡើងនៃសង្រ្គាម។

លោក Yousef Barakat ដែលកំពុងរង់ចាំនៅអាកាសយានដ្ឋាន Najaf ដើម្បីឡើងយន្តហោះរបស់ក្រុមហ៊ុនអាកាសចរណ៍មជ្ឈឹមបូព៌ា ទៅកាន់ទីក្រុងបេរូត Beirut បាននិយាយថា៖«ការត្រឡប់មកផ្ទះវិញគឺលឿនជាងការរំពឹងទុក។ បទឈប់បាញ់ ត្រូវបានសម្រេច។ យើងជាអ្នកភាគខាងត្បូង នឹងមិនបោះបង់ចោលទឹកដីរបស់យើងទេ»។ មន្ត្រីអាកាសយានដ្ឋាន Najaf បានអះអាងថា ជនជាតិលីបង់ប្រហែល ៨០០ នាក់ កំពុងចាកចេញទៅកាន់ទីក្រុងបេរូត រៀងរាល់សប្តាហ៍ ខណៈដែលអ្នកផ្សេងទៀត កំពុងប្រើប្រាស់រថយន្តក្រុងដែលផ្តល់ដោយរដ្ឋាភិបាល ដើម្បីធ្វើដំណើរទៅកាន់ច្រកព្រំដែន Qaim ជាមួយប្រទេសស៊ីរី ហើយបន្ទាប់មកបន្តទៅកាន់ប្រទេសលីបង់។