ភ្នំពេញ៖ កម្ពុជាបានឡើងចំណាត់ថ្នាក់លើសសិង្ហបុរី ដោយមានពិន្ទុភាគរយខ្ពស់ជាងក្នុងការសម្រេចបាននូវអត្រាខ្ពស់បំផុតនៃការចាក់វ៉ាក់សាំងប្រឆាំងនឹងជំងឺកូវីដ-១៩ នៅក្នុងតំបន់អាស៊ីប៉ាស៊ីហ្វិក។

នេះបើតាមការចេញផ្សាយរបស់ AKP នៅថ្ងៃទី២៦ ខែតុលា ឆ្នាំ២០២១ ដែលយកប្រភពពី Global Change Data Lab។ ទិន្នន័យដែលចងក្រងដោយអង្គការសប្បុរសធម៌ របស់ចក្រភពអង់គ្លេស នៃសាកលវិទ្យាល័យ Oxford បានបង្ហាញនៅថ្ងៃទី២៦ ខែតុលា ឆ្នាំ២០២១នេះថា ប្រជាជនកម្ពុជាប្រមាណ ៨០.៦០ភាគរយ នៃចំនួនប្រជាជនសរុប បានទទួលការចាក់វ៉ាក់សាំងប្រឆាំងនឹងវីរុសកូវីដ-១៩។ ចំណែកនៅប្រទេសសិង្ហបុរី ចំនួ នប្រជាជនដែលទទួលបានការចាក់វ៉ាក់សាំងមាន ៨០,៥៨ភាគរយ ខណៈដែលកូរ៉េខាងត្បូង មានចំនួន ៧៩,៤៦ភាគរយ, ព្រុយណេ ៧៨,៦៣ភាគរយ, ម៉ាឡេស៊ី ៧៧,៣៩ភាគរយ, ជប៉ុន ៧៦,៨៨ ភាគរយ, នូវែលសេឡង់ ៧៤,៩៥ភាគរយ, អូស្ត្រាលី ៧២,៨៨ ភាគរយ, កោះតៃវ៉ាន់ ៦៦,៥១ភាគរយ, ទីក្រុងម៉ាកាវ ៦៤,៥៩ភាគរយ និងទីក្រុងហុងកុង ៦០,៧៨ភាគរយ។

អត្រានៃការចាក់វ៉ាក់សាំងទាបជាងគេ នៅក្នុងចំណោមប្រទេសសំខាន់ៗផ្សេងទៀតនៅក្នុងតំបន់ គឺថៃ ៥៤,៥២ភាគរយ, វៀតណាម ៥២,៨៥ភាគរយ, ឡាវ ៤៣,០៦ភាគរយ, ឥណ្ឌូណេស៊ី ៤០,៩០ភាគរយ,ហ្វីលីពីន ២៥,០៦ភាគរយ និងសហភាពមីយ៉ាន់ម៉ា ២០,៤៨ភាគរយ។

កម្មវិធី Our World In Data របស់អង្គការ Global Change Data Lab គឺមិនបានរាប់បញ្ចូលប្រទេសចិននៅក្នុងអត្រានៃការចាក់វ៉ាក់សាំងនេះទេ ចាប់តាំងពីដើមខែតុលាមក។ ចិនធ្លាប់ជាប់ចំណាត់ថ្នាក់លេខ២នៅក្នុងតំបន់ បន្ទាប់ពីសិង្ហបុរី ប៉ុន្តែថ្មីៗនេះចំណាត់ថ្នាក់នេះត្រូវបានជំនួសដោយកម្ពុជា និងកូរ៉េខាងត្បូង។

កម្មវិធី Our World in Data បានបញ្ជាក់ពីការគណនាតួលេខនេះ ដោយផ្អែកទៅលើចំនួនប្រជាជនសរុប និងមនុស្សគ្រប់វ័យ ជាជាងគណនាដោយផ្អែកទៅលើចំនួនប្រជាជនដែលជាក្រុមគោលដៅសម្រាប់ទ ទួលបានការចាក់វ៉ាក់សាំង ដែលជារឿយៗមានតែក្រុមមនុស្សពេញវ័យប៉ុណ្ណោះ។ ដើម្បីបង្កើនឱ្យមានអត្រាប្រហាក់ប្រហែលគ្នា កម្មវិធីនេះមិនបានគិតអំពីនិយមន័យនៃការចាក់វ៉ាក់សាំងពេញលេញទេ ប៉ុ ន្តែគេគិតទៅលើអត្រានៃប្រជាជនដែលបានចាក់វ៉ាក់សាំងយ៉ាងហោចណាស់មួយដូស ក្នុងចំណោមវ៉ាក់សាំងពីរដូស៕ ដោយ៖ គង់ ឌិន