ទីភ្នាក់ងារសារព័ត៌មាន DPA រាយការណ៍ថា រដ្ឋមន្ត្រីការបរទេសអាល្លឺម៉ង់លោក ស្រី Annalena Baerbock មិនបានច្រានចោលថា ទីក្រុងប៊ែរឡាំងអាចបញ្ជូនកងរក្សាសន្តិភាព ទៅអ៊ុយក្រែន ប្រសិនបើបទឈប់បាញ់ ត្រូវសម្រេចបាន។

យោងតាមប្រព័ន្ធផ្សព្វផ្សាយនេះបានឲ្យដឹងថា លោកស្រី Baerbock បាននិយាយនៅក្នុងកិច្ចប្រជុំមួយរបស់ក្រុមរដ្ឋមន្ត្រីការបរទេសណាតូ នៅទីក្រុងប្រ៊ុចសែលថា ទាហានអាល្លឺម៉ង់ អាចត្រូវបានគេប្រើប្រាស់ដើម្បីធានាសន្តិភាព។

លោកស្រីក៏ជឿជាក់ផងដែរថា រួមជាមួយនឹងការធានាសន្តិសុខសម្រាប់អ៊ុយក្រែន ក្នុងទម្រង់ជាសមាជិកអង្គការណាតូ «វត្តមានអន្តរជាតិដែលមានបំណងធានាបទឈប់បាញ់មួយ» អាចត្រូវបានពិចារណា។

រដ្ឋមន្ត្រីការបរទេសអាល្លឺម៉ង់នេះ បានបន្ថែមថា ទីក្រុងប៊ែរឡាំង «នឹងខិតខំគាំទ្រ» រាល់កិច្ចខិតខំប្រឹងប្រែង សំដៅសម្រេចបានសន្តិភាព។

ប្រធានាធិបតីបារាំងលោក Emmanuel Macron បាននិយាយកាលពីថ្ងៃទី ២៦ ខែកុម្ភៈថា ប្រទេសលោកខាងលិចប្រហែល ២០ដែលចូលរួមក្នុងកិច្ចប្រជុំទីក្រុងប៉ារីសស្តីពីជំនួយបន្ថែមសម្រាប់ទីក្រុងគីវ បានពិភាក្សាអំពីលទ្ធភាពនៃការបញ្ជូនកងទ័ព ទៅកាន់អ៊ុយក្រែន។ យោងតាមលោក Macron មិនមានការឯកភាពគ្នាណាមួយ ត្រូវបានឈានដល់លើបញ្ហានេះទេ ប៉ុន្តែលទ្ធភាពបែបនេះ មិនអាចត្រូវបានគេច្រានចោលនៅពេលអនាគតទេ។ អ្នកនាំពាក្យប្រធានាធិបតីរុស្សី លោក Dmitry Peskov បាននិយាយថា ការដាក់ពង្រាយកងទ័ពបរទេស ទៅកាន់អ៊ុយក្រែន នឹងនាំឲ្យមានផលវិបាកធ្ងន់ធ្ងរ ប្រសិនបើមិនអាចកែប្រែវិញបាននោះទេ។